Russiýanyň demir ýollarynyň otlularynda ýolbelet robot peýda bolar
Russiýanyň otlularynda ýolagçylara hyzmat etmek üçin robotlaşdyrylan kömekçini ornaşdyrmak meýilleşdirilýär. Bu barada «RŽD»-niň baş direktory Oleg Belozýorow Halkara ýaşlar festiwalynyň çäginde geçirilen «Знание.Первые» aň-bilim marafonynda çykyş eden mahalynda habar berdi.
Kompaniýanyň ýolbaşçysynyň aýtmagyna görä, işläp taýýarlanan enjam ýokary tizlikli «Sapsan» otlusynyň synag gatnawynyň dowamynda eýýäm synagdan geçirildi. «RŽD» robotyň mundan beýläk gönüden-göni ýolagçy gatnawlarynda ulanylmagy mümkinçiligine seredýär.
Ulag pudagynyň robotlaşdyrylmagy
Bu taslama Russiýanyň ulag pudagynda robotlaşdyrylan tehnologiýalaryň ösdürilýändigini görkezýär. Ýolbelet robotyň ýolagçylara hyzmat etmek bilen bagly käbir wezipeleri ýerine ýetirmegi göz öňünde tutulýar.
Şol bir wagtyň özünde, Belozýorowyň sözlerine görä, robotlaşdyrylan ulgamlar adamyň ornuny doly tutmaz. Robotlaşdyrylan toplumlara gözegçilik etmek we karar kabul etmek işi adamlaryň ygtyýarynda galar.
«RŽD»-niň ýolbaşçysy ýolbelediň işiniň ýolagçylar bilen gönüden-göni aragatnaşyk saklamagy talap edýändigini we ynsanperwer çemeleşmä mätäçdigini hem belledi.
Robototehnikanyň ösdürilmegi
Robotlaşdyrylan tehnologiýalar Russiýanyň ykdysadyýetiniň beýleki pudaklarynda hem ösdürilýär. «KAMAZ» kompaniýasy özbaşdak işläp taýýarlan antropomorf robotlary bilen bazara çykmagy meýilleşdirýär. Kompaniýa häzirki wagtda olary kärhananyň içinde synagdan geçirýär.
Işlenip taýýarlanylýan ulgamlar häzirki wagtda adamlar tarapyndan el bilen ýerine ýetirilýän amallary amala aşyrmak üçin niýetlenendir. Olaryň gurluşy we antropometrik ölçegleri adamyň eliniň mümkinçiliklerine laýyklykda göz öňünde tutulandyr.
Şunuň ýaly tehnologiýalaryň ösdürilmegi ulag we senagat pudaklarynda robotlaşdyrylan çözgütleriň ulanylýan ugurlarynyň giňelýändigini görkezýär.
