Türkmen küştçileri Samarkantda geçirilýän 46-njy Bütindünýä Küşt olimpiadasyna üstünlikli başladylar
«Silk Road Samarkand» Halkara sergi merkezinde 16–27-nji sentýabr aralygynda FIDE-niň howandarlygynda geçirilýän dünýäniň esasy toparlaýyn küşt ýaryşy — 46-njy Bütindünýä Küşt olimpiadasynyň birinji tapgyrynyň duşuşyklary geçirildi. Türkmenistanyň erkekler we zenanlar ýygyndylarynyň ikisi hem ýokary derejede ünslülik görkezip, garşydaşlaryndan ynamly ýeňiş gazandylar.
Türkmenistanyň 65-nji belgili erkekler ýygyndysy Timor-Leste döwletiniň toparyny 4:0 hasabynda ýeňdi. Grossmeýster Saparmyrat Atabaýew, FIDE-niň ussady Amanmuhammet Hommadow, Şahruh Turaýew we Wepaly Halynýazow öz duşuşyklarynda ynamly ýeňiş gazandylar. Grossmeýster Meýlis Annaberdiýew bolsa ätiýaçda galdy. Türkmenistanyň at gazanan tälimçisi Serdar Annaberdiýewiň ýolbaşçylygyndaky topar dört tagtanyň ählisinde duşuşygyň gidişine doly gözegçilik etdi.
Zenanlar ýygyndysy hem Mergen Kakabaýewiň ýolbaşçylygynda ýaryşa şeýle-de 4:0 hasabyndaky ýeňiş bilen başlady. Lihtenşteýniň ýygyndysyna garşy geçirilen duşuşykda milli toparymyza FIDE-niň ussady bolmaga dalaşgär Leýla Şöhradowa, FIDE-niň ussady Jahan Rejepowa, Mähri Agamyradowa we Ogulsuraý Baýrambaýewa utuk getirdiler. Zenanlar toparynyň lideri Lala Şöhradowa bolsa esasy duşuşyklaryň öňüsyrasynda meýilnama laýyklykda dynç almak üçin ilkinji tapgyra gatnaşmady.
Netijeli başlangyç toparyň yzygiderli taýýarlygynyň netijesini görkezdi. Türkmenistanyň grossmeýsterleri jemleýji okuw-türgenleşik ýygnanyşygyny Gazagystanyň Küşt federasiýasy bilen bilelikdäki «Freedom Asian Chess Initiatives» maksatnamasynyň çäklerinde halkara grossmeýster Aleksandr Rahmanowyň ýolbaşçylygynda geçirdiler.
Türkmenistanyň wekiliýeti diňe bir Budapeştde geçirilen öňki Küşt olimpiadasyndaky taryhy üstünligi gaýtalamagy däl, eýsem şahsy reýtinglerini ýokarlandyrmagy we halkara ussatlarynyň derejelerini ýerine ýetirmegi hem maksat edinýär. Geçen Olimpiadada Türkmenistanyň erkekler we zenanlar ýygyndylary öz reýting toparlarynda birinji orny eýeläpdi.
Indiki, ikinji tapgyrda milli ýygyndylarymyza ýaryşyň esasy dalaşgärleri bilen çynlakaý synaglar garaşýar: Türkmenistanyň erkekler ýygyndysy Serbiýanyň topary bilen, zenanlar ýygyndysy bolsa Polşanyň küştçileri bilen duşuşar.
