Türkmenistanyň Söwda we daşary ykdysady aragatnaşyklar ministrligi we GIZ Hazarüsti geçelgesiniň taslamasy boýunça sanly hyzmatdaşlygy giňeldýär
Türkmenistanyň Söwda we daşary ykdysady aragatnaşyklar ministrligine Söwda amallaryny ýeňilleşdirmek boýunça pudagara iş toparynyň Sekretariatynyň işini üpjün etmek üçin IT enjamlary gowşuryldy. Enjamlary tabşyrmak işi 15-nji sentýabrda Germaniýanyň Hökümeti we Ýewropa Bileleşigi tarapyndan maliýeleşdirilýän GIZ-niň sebit maksatnamasynyň çäklerinde geçirildi.
Taslama Hazarüsti ulag geçelgesiniň mümkinçiliklerini ösdürmäge we Merkezi Aziýada söwda amallaryny ýeňilleşdirmäge gönükdirilendir. Şu ýyl döredilen we ýurduň esasy ministrlikleriniň hem-de pudaklaýyn edaralarynyň ýolbaşçylaryny birleşdirýän pudagara iş topary eksport-import we üstaşyr amallary wagtynda administratiw päsgelçilikleri azaltmaga mümkinçilik berjek milli we sebit başlangyçlaryny işläp düzmek bilen meşgullanýar.
Sekretariaty häzirki zaman tehniki enjamlar bilen üpjün etmek Türkmenistanyň Söwda we daşary ykdysady aragatnaşyklar ministrligi bilen Germaniýanyň Halkara hyzmatdaşlyk boýunça jemgyýetiniň (GIZ) arasynda gol çekilen Özara düşünişmek hakyndaky Ähtnamanyň durmuşa geçirilmegindäki nobatdaky amaly ädim boldy. Iş prosesleriniň sanlylaşdyrylmagynyň daşary söwdanyň häzirki zaman standartlarynyň ornaşdyrylmagyny çaltlandyrmagyna, şeýle hem Türkmenistanyň sebitiň ýurtlary we Ýewropa Bileleşigi bilen ykdysady-logistika gatnaşyklarynyň pugtalandyrylmagyna ýardam bermegine garaşylýar.
