Türkmenistanyň Ilçisi Kataryň Sport we ýaşlar ministriniň orunbasary bilen duşuşyk geçirdi
6-njy sentýabrda Türkmenistanyň Katar Döwletindäki Ilçi M.Seýitmämmedow Kataryň Sport we ýaşlar ministriniň orunbasary Ýasser bin Abdullah Al Jamal bilen duşuşyk geçirdi.
Duşuşygyň barşynda Ilçi 2026-njy ýylyň «Garaşsyz, baky Bitarap Türkmenistan - bedew batly at-myradyň mekany» ýyly diýlip yglan edilmegi we Döwlet Garaşsyzlygymyzyň 35 ýyllygy mynasybetli ýurdumyzda ýokary derejede guralýan çäreler hem-de döwletimiziň hemişelik bitaraplyk syýasatynyň ugurlaryny tanyşdyrmak bilen bir hatarda, Türkmenistanyň BMG bilen hyzmatdaşlşygy diňe bir milli bähbitleri goramak bilen çäklenmän, eýsem bütin dünýäde parahatçylygyň, durnukly ösüşiň we ynsanperwerligiň dabaralanmagyna gönükdirilen uzak möhletleýin strategik hyzmatdaşlyk diýip aýratyn belläp geçdi.
Mundan başgada Ilçi ýurdumyzda ýaşlar syýasaty hem-de bu ulgamda halkara hyzmatdaşlygynyň ösdürilmegine uly üns berilýändigini, we ýaşlar babatynda bilelikdäki anyk çäreleriň durmuşa geçirilmegi özara bähbitli hyzmatdaşlygy ösdürmäge täsir etjekdigini belledi.
Şeýle hem ol ýurdumyzda sport ulgamynda, sagdyn durmuş ýörelgesini ýaýbaňlandyrmak we halkara arenada üstünlik gazanmak üçin köp sanly taslamalaryň durmuşa geçirilýändigi nygtady. Hususanda Aşgabatda we ähli welaýatlarda döwrebap we iň ýokary talaplara gabat gelýän desgalaryň gurulyp, ýurdumyzda ýylyň dowamynda halkara sport çäreleri geçirmäge ähli şertleriň bardygyna ünsi çekdi. Şunuň bilen gelejekde bilelikdäki sport çäreleri, türgenleşikleri geçirmek maksady bilen Türkmenistanyň we Kataryň sport federasiýalarynyň arasynda hyzmatdaşlygy ösdürmegiň mümkinçilikleri bellenildi.
Taraplar sport ulgamynda we ýaşlar babatynda bar bolan ylalaşyklara esaslanyp, gelejekde hyzmatdaşlygy ösdürmegiň anyk ugurlaryny ara alnyp maslahatlaşdylar.
