Sony kompaniýasy Xperia 10 VIII smartfonyny hödürledi
Ýaponiýanyň «Sony» kompaniýasy täze orta baha derejesindäki Xperia 10 VIII smartfonyny resmi taýdan mälim etdi. Täze önüm brendiň özboluşly tanalýan stilini, amaly we ykjam korpusyny saklap galyp, displeýde hem-de öndürijilikde birnäçe üýtgeşmeleri başdan geçirdi.
Modeliň esasy gowulaşdyrylan tarapy Full HD+ durulykdaky 6,1 dýuýmlyk OLED-ekran boldy. Bu seriýada ilkinji gezek displeý 120 Gs ýokary täzeleniş ýygylygyna eýe boldy, onuň iň ýokary ýagtylygy bolsa geçen nesil bilen deňeşdirilende 50% ýokarlandy. Munuň netijesinde smartfondan açyk howada, ýiti gün şöhlelerinde peýdalanmak has-da amatly boldy.
Öndürijilige 8 GB operatiw ýat bilen utgaşdyrylan kuwwatlylygy tygşytlaýjy «Qualcomm Snapdragon 6 Gen 3» prosessory jogap berýär. Smartfon gündelik işlerde we oýunlarda çalt hem-de gijä galmasyz işleýär.
Surata düşürmek mümkinçilikleri 50 MP esasy datçigi we 13 MP ultra giň burçly obýektiwi bolan goşa esasy kamera arkaly amala aşyrylýar. «Sony» adaty bolşy ýaly, häzirki zaman smartfonlarynda seýrek duş gelýän aýratynlyklary saklap galypdyr: simli gulaklyklar üçin 3,5 mm birikdiriji, microSD ýat kartasy üçin slot we IP68 standarty boýunça suwdan hem-de tozandan doly goralan korpus.
Sony Xperia 10 VIII ygtybarly, goralan we bir eliň kömegi bilen dolandyrmaga amatly, ajaýyp awtonomiyaly hem-de ýokary hilli ekrany bolan smartfony gözleýän ulanyjylar üçin örän laýyk gelýär.
ORIENT
