Serdar Berdimuhamedow Täjigistanyň daşary işler ministri Sirojiddin Muhriddini kabul etdi
20-nji awgustda Prezident Serdar Berdimuhamedow Türkmenistana sapar bilen gelen Täjigistan Respublikasynyň daşary işler ministri Sirojiddin Muhriddini kabul etdi.
Täjigistanyň daşary işler ministri Prezident Emomali Rahmonyň salamyny ýetirdi we Türkmenistan bilen gatnaşyklary pugtalandyrmagyň Duşenbeniň daşary syýasatynyň esasy ileri tutulýan ugurlarynyň biri bolup galýansdygyny nygtady. Prezident Serdar Berdimuhamedow Täjigistanyň ýokary ýolbaşçylygyna öz gezeginde iň gowy arzuwlaryny beýan edip, häzirki saparyň ikitaraplaýyn strategik hyzmatdaşlygyň giňeldilmegine güýçli itergi berjekdigine ynam bildirdi.
Duşuşygyň dowamynda ikitaraplaýyn görnüşde, şeýle hem halkara düzümleriň — BMG-niň, GDA-nyň, YHG-nyň we «Merkezi Aziýa +» formatynyň çäklerinde işjeň hyzmatdaşlygyň ýokary derejesi bellenildi. Döwlet Baştutany Türkmenistanyň şu ýyl GDA-da başlyklyk etmeginiň çäklerinde «Awaza» milli syýahatçylyk zolagynda Arkalaşygyň döwlet Baştutanlarynyň Geňeşiniň nobatdaky mejlisiniň hem-de Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň konsultatiw duşuşygynyň geçirilmeginiň meýilleşdirilýändigini aýratyn nygtady. Bu bolsa sebitara dialogy pugtalandyrmakda täze ädim bolar.
Söwda-ykdysady hyzmatdaşlyk babatda Türkmenistanyň we Täjigistanyň bilelikdäki hökümetara toparynyň işine möhüm orun berildi. Prezident Serdar Berdimuhamedow energetika, ulag we oba hojalygy ugurlarynda hyzmatdaşlygy ösdürmek üçin uly mümkinçilikleriň bardygyny belledi. Şeýle hem söhbetdeşler iki halkyň taryhy we ruhy umumylygyna esaslanýan çuň medeni-ynsanperwer hyzmatdaşlyk ugruny tassykladylar.
