Türkmenistan bilen Täjigistan 2027–2028-nji ýyllar üçin diplomatik hyzmatdaşlyk maksatnamasyny tassyklady
20-nji awgustda Aşgabatda resmi sapar bilen Türkmenistana gelen Täjigistan Respublikasynyň daşary işler ministri Sirojiddin Muhriddin bilen Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň arasynda gepleşikler geçirildi. Duşuşyklar dar we giňeldilen düzümlerde geçirilip, iki ýurduň daşary syýasat edaralarynyň arasynda 2027–2028-nji ýyllar üçin hyzmatdaşlyk etmegiň maksatnamasynyň gol çekilmegi bilen tamamlandy.
Syýasy geňeşmeleriň dowamynda taraplar Aşgabat bilen Duşanbeniň arasyndaky strategik hyzmatdaşlyga ýokary baha berdiler we syýasy-diplomatik gatnaşyklary mundan beýläk-de kämilleşdirmek boýunça anyk ädimleri ara alyp maslahatlaşdylar. BMG-niň çäklerindäki netijeli hyzmatdaşlygyň ähmiýetini kanagatlanma bilen nygtadylar. Täjigistan Respublikasy Türkmenistanyň başlangyjy bilen kabul edilen 30-dan gowrak kararnamanyň awtordaşy bolup çykyş etdi.
Söwda-ykdysady ugur boýunça diplomatlar haryt dolanyşygynyň möçberleriniň durnukly ösýändigini belläp, energetika, ulag, logistika, oba hojalygy we özara maýa goýumlary ýaly ugurlarda hyzmatdaşlygy giňeltmek baradaky niýetlerini beýan etdiler. Işewürler arasyndaky dialogy işjeňleşdirmek üçin şu ýyl Duşanbede geçirilen Hyzmatdaşlyk boýunça bilelikdäki hökümetara toparynyň 14-nji mejlisi we Türkmen-täjik işewürler geňeşiniň ikinji mejlisi möhüm esas bolup hyzmat etdi.
Daşary işler ministrleri medeni-ynsanperwer ulgamyna hem uly üns berdiler. Iki ýurduň halklarynyň arasyndaky gatnaşyklary mundan beýläk-de ýakynlaşdyrmak maksady bilen ýakyn geljekde bilelikde geçiriljek çäreleriň meýilnamasyny ylalaşdylar.
