Er-Riýad sportyň 18 görnüşi boýunça ýapyk binalardaky VI Aziýa oýunlaryny ýokary tehnologik derejede geçirmäge taýýarlanýar
Ýapyk binalarda we söweş sungaty boýunça VI Aziýa oýunlarynyň (AIMAG 2026) Guramaçylyk komiteti Aziýanyň Olimpiýa Geňeşi bilen bilelikde Er-Riýadda dekabr aýynda geçiriljek ýaryş üçin infrastruktura taýýarlygynyň jemleýji tapgyryna çykdy. Guramaçylar ýaryşyň tehnologik hyzmatdaşyny we 2026-njy ýylyň 11–21-nji dekabry aralygynda “Boulevard City” sport toplumynyň arenalarynda geçiriljek ýaryşlaryň jikme-jik tertibini tassykladylar.
Ýaryşlaryň sanly ekoulgamyny, şol sanda wideoarbitraž, wagt ölçeg, netijeleri işlemek we akkreditasiýa hyzmatlary ulgamlaryny “Bornan Sports Technology” kompaniýasy üpjün eder. Aziýa-Ýuwaş umman sebitiniň ýurtlaryndan gelen türgenler sportyň 18 görnüşi boýunça 122 medal toplumy ugrunda bäsleşerler.
Esasy üns göreş we güýç talap edýän sport görnüşlerine — göreş, dzýudo, jiu-jitsu, muay-taý, taekwondo, boks, karate, MMA we agyr atletika gönükdiriler. Sportuň oýun we intellektual ugurlaryna bolsa futzal, 3x3 basketbol, küşt, kibersport, tekbol we beýleki görnüşler girer.
Türgenler şäherçesi Şa zenany Nura adyndaky uniwersitetiň çäginde ýerleşip, ilkinji wekiliýetleri 8-nji dekabrdan kabul edip başlar. Aziýanyň sport hereketi üçin Saud Arabystanyndaky bu ýaryş geljekki tomusky Aziýa oýunlaryna taýýarlygyň möhüm tapgyry bolar. Türkmen türgenleri üçin bolsa bu ýaryş öz derejesini ýene bir gezek tassyklamak üçin möhüm meýdança öwrüler. Bu ýaryşlaryň taryhy Türkmenistan bilen berk baglanyşyklydyr. 2017-nji ýylyň sentýabrynda Aşgabatda dabaraly ýagdaýda geçirilen Ýapyk binalarda we söweş sungaty boýunça V Aziýa oýunlary ýaryşyň geriminde düýpli öwrülişik boldy. Şonda Okeaniýa ýurtlarynyň Olimpiýa komitetleri ilkinji gezek resmi taýdan ýaryşlara gatnaşdylar. Olimpiýa şäherçesindäki ýokary derejeli guramaçylyk hem-de Türkmenistanyň ýygyndy toparynyň 245 medal bilen umumy toparlaýyn hasapda birinji orny eýelemegi «Aşgabat-2017» oýunlaryny sportuň we myhmansöýerligiň nusgalyk baýramçylygy hökmünde taryha hemişelik ýazdy.
Şol bir wagtyň özünde, XX Aziýa oýunlary 19-njy sentýabrdan 4-nji oktýabra çenli Aýti we Nagoya şäherlerinde geçiriler. Şeýlelikde, Ýaponiýa Tokio-1958 we Hirosima-1994 oýunlaryndan soň bu iri sport çäresini üçünji gezek kabul eder.
