Gümrük işgärleri Türkmenbaşy — Baku ugry boýunça Orta geçelgäniň howpsuzlygyny üpjün etmek boýunça türgenleşik geçirdiler
Hazarüsti halkara ulag ugry (Orta geçelge) boýunça ýük akymynyň artmagy kenarýaka we üstaşyr döwletlerden howpsuzlygy hem-de gözden geçiriş işleriniň tizligini üpjün etmekde düýpgöter täze çemeleşmeleri talap edýär. Şu meselä Türkmenistanyñ, Azerbaýjanyň, Gazagystanyň we Täjigistanyň port gözegçiligi bölümleriniň işgärleri üçin geçirilen amaly okuw-türgenleşik işi bagyşlandy.
Çäre BMG-niň Neşe serişdeleri we jenaýatçylyk boýunça müdirliginiň (UNODC), Bütindünýä gümrük guramasynyň (BGG), BMG-niň Söwda we ösüş boýunça konferensiýasynyň (UNCTAD) hem-de Gümrük edaralarynyň sebitleýin torunyň (IREN) howandarlygynda geçirildi.
Türgenleşigiň özboluşly görnüşi Hazar deňziniň iki möhüm merkezini — Türkmenbaşy Halkara deňiz portuny we Azerbaýjanyň Alýat portuny birleşdirdi. Amaly tapgyr Türkmenistanda başlandy, soňra Hazar deňzinden geçiş wagtynda parom gämisiniň üstünde dowam etdi we Bakuda tamamlandy.
Gämide we portlarda geçirilen gözegçilikleriň esasy maksady ýokary töwekgelçilikli ýükleri ýüze çykarmak we olaryň saklanylmagyny üpjün etmek boýunça endikleri kämilleşdirmek, şeýle hem sebitdäki port hyzmatlarynyň arasynda maglumatlaryň hakyky wagt düzgüninde alyş-çalşygyny ýola goýmakdan ybarat boldy.
Baku şäherindäki Bütindünýä gümrük guramasynyň mümkinçilikleri artdyrmak boýunça edara merkezinde geçirilen jemleýji mejlisde Azerbaýjanyň Döwlet gümrük komitetiniň başlygynyň orunbasary, general-maýor Fuad Mämedow Orta geçelge boýunça üpjünçilik zynjyrlarynyň üznüksizliginiň we howpsuzlygynyň edaralaryň arasynda maglumat alyş-çalşygynyň tizligine hem-de sanly tehnologiýalaryň ornaşdyrylmagyna gönüden-göni baglydygyny belledi.
Nazary bölümde Bütindünýä gümrük guramasynyň bilermenleri we Azerbaýjanyň gümrük işgärleri Merkezi Aziýadan gelen kärdeşlerine gözden geçiriş üçin niýetlenen öňdebaryjy sanly platformalary hödürlediler hem-de deňiz arkaly gümrük düzgünleriniň bozulmagynyň öňüni almak boýunça amaly ýagdaýlaryň seljermesini geçirdiler.
Hazar deňziniň portlarynyň işiniň şeýle utgaşdyrylmagy iki sany strategik meseläni çözmäge mümkinçilik berýär: bikanun ýük daşamak we kontrabanda töwekgelçiliklerini azaltmak, şeýle hem Merkezi Aziýa bilen Günorta Kawkazyň arasyndaky esasy üstaşyr ugurlarda kanuny iş alyp barýan kärhanalar üçin gümrük amallaryndan geçmegiň wagtyny ep-esli gysgaltmak.
