Özbegistan bilen Türkmenistan üstaşyrmalary ýeňilleşdirmek we göni howa gatnawlaryny ýola goýmak barada ylalaşýarlar
Özbegistanyň ulag-logistika pudagynyň wekilleri Daşkentde Türkmenistanyň Adatdan daşary we Doly ygtyýarly Ilçisi Şadurdy Meredow bilen duşuşyk geçirdiler. Gepleşikleriň esasy meselesi administratiw päsgelçilikleri aradan aýyrmak, harytlaryň hereketini çaltlaşdyrmak we iki döwletiň arasyndaky ulag ugurlaryny giňeltmek boldy.
Duşuşyga ulag meselelerini öwrenmek boýunça degişli merkeziň ýolbaşçy işgärleri, Özbegistanyň Daşary işler ministrliginiň hünärmenleri, Halkara awtoulag daşaýjylary assosiasiýasynyň wekilleri, şeýle hem iri ekspeditor kompaniýalary gatnaşdylar.
Daşkent türkmen kärdeşlerine serhet geçelgelerindäki işleriň netijeliligini ýokarlandyrmak boýunça birnäçe amaly çäreleri teklip etdi. Olaryň hatarynda ýük awtoulaglarynyň sürüjileri üçin wizalary elektron görnüşde resmileşdirmäge geçmek, degişli tölegleri azaltmak we nobatlaryň emele gelmeginiň öňüni almak maksady bilen esasy «Farap — Alat» barlag-göýberiş nokadynda barlag işlerini çaltlaşdyrmak bar. Esasy üns tiz zaýalanýan önümleri daşaýan ýük awtoulaglary üçin aýratyn «ýaşyl geçelgäni» döretmäge we bitarap zolakda ikinji köprini gurmaga gönükdirildi.
Mundan başga-da, taraplar ulaglaryň agram we ölçeg çäklendirmelerine täzeden garamak, awtoulag-demir ýol ugurlary üçin Türkmenbaşy deňiz portunyň infrastrukturasyny has işjeň peýdalanmak, şeýle hem iki ýurduň arasynda göni yzygiderli howa gatnawlaryny täzeden ýola goýmak meselelerini ara alyp maslahatlaşdylar.
Türkmenistanyň diplomatik wekilhanasy öňe sürlen ähli başlangyçlary bilelikdäki çözgütleri işläp taýýarlamak üçin Türkmenistanyň degişli döwlet edaralarynyň garamagyna dessin geçirmeklige taýýardygyny mälim etdi.
