Türkmenistanyň DIM-niň ýolbaşçysy Awazada geçirilen forumyň çäginde birnäçe diplomatik duşuşyklary geçirdi
12-nji awgustda Türkmenistanyň Daşary işler ministri Raşid Meredow Awazada diplomatik wekilhanalaryň ýolbaşçylary hem-de halkara guramalaryň wekilleri bilen birnäçe ikitaraplaýyn duşuşyklary geçirdi. Gepleşikler Hazar deňziniň güni mynasybetli geçirilen «Hazar deňziniň ekoulgamyny goramak: sebit hyzmatdaşlygy we durnukly ösüş» atly halkara maslahatyň çäginde geçirildi.
Ýewropa Bileleşiginiň Türkmenistandaky ilçisi Beata Peksa bilen bolan duşuşykda türkmen-ýewropa hyzmatdaşlygynyň häzirki ýagdaýy we geljegi ara alnyp maslahatlaşyldy. Şeýle hem yzygiderli syýasy dialogyň we Hazar deňziniň daşky gurşawyny goramak boýunça bilelikdäki başlangyçlaryň ähmiýetine aýratyn üns berildi.
Türkmenistanyň daşary syýasat edarasynyň ýolbaşçysy BMG-niň çäginde ýurduň halkara başlangyçlaryny ilerletmek we bilelikdäki çäreleri utgaşdyrmak meselelerini BMG-niň Türkmenistandaky Hemişelik utgaşdyryjysy Sýaosýun Greýs Wan bilen ara alyp maslahatlaşdy. Taraplar sebitde ekologik durnuklylygy üpjün etmek boýunça tagallalary birleşdirmegiň wajypdygyny hem bellediler.
ÝHHG-niň Aşgabatdaky Merkeziniň ýolbaşçysy Uilýam Lif bilen geçirilen duşuşykda sebitleýin howpsuzlyk, ynsanperwer, ykdysady-ekologik hyzmatdaşlyk meselelerine esasy üns berildi. Şunda Hazar deňziniň ekoulgamyny goramaklyga aýratyn üns berildi.
Migrasiýany dolandyrmak we migrantlaryň hukuklaryny goramak ulgamynda ekologik ýagdaýlary nazara almak bilen amaly hyzmatdaşlygyň esasy ugurlary bolsa Migrasiýa boýunça halkara guramasynyň (HMG) Merkezi Aziýa ýurtlary boýunça utgaşdyryjysy Serhan Aktoprak bilen geçirilen gepleşiklerde kesgitlendi.
