Google el hereketleriniň dilini tekste terjime edýän SL2T emeli aň modelini hödürledi
Google DeepMind bölümi el hereketleriniň dilini hakyky wagt tertibinde tekste terjime edip bilýän innowasion SL2T emeli aň modelini işläp taýýarlady. Bu tehnologiýa dünýäde el hereketleriniň dilini ulanýan 70 million adam üçin döredildi. Ilkinji bolup bu ulgamy Pixel 11 smartfonlarynyň eýeleri Gboard we Live Transcribe goşundylarynyň üsti bilen synap bilerler. Başlangyç tapgyrynda model amerikan el hereketleri dilini goldaýar we ony iňlis diline terjime edýär.
Smartfony doly dolandyrmak we aragatnaşyk saklamak
SL2T-iň kömegi bilen ker we eşidişi pes ulanyjylar tekst girizmezden smartfon bilen aragatnaşyk saklap bilerler. Indi el hereketleriniň üsti bilen:
• internetden maglumat gözläp we elektron hat ýazyp;
• messenjerlerde we sosial ulgamlarda aragatnaşyk saklap;
• Gemini emeli aň kömekçisine buýruk berip;
• wideogepleşikleriň dowamynda el hereketleriniň dilini gönüden-göni terjime edip bolýar.
Bu nähili işleýär we maglumatlaryň goragy
Beýleki meňzeş ulgamlardan tapawutlylykda, SL2T diňe elleriň hereketini däl, eýsem ýüz keşbini, kelläniň we bedeniň hereketlerini hem yzarlaýar. Bu bolsa aýdylýan pikiriň manysyny takyk geçirmek üçin örän möhümdir. Model çep elli we sag elli ulanyjylar, şeýle hem diňe bir elini ulanýan adamlar üçin hem uýgunlaşdyryldy.
Işläp düzüjiler şahsy maglumatlaryň gizlinligine hem aýratyn üns berdiler: ulanyjylaryň wideo ýazgylary buluda iberilmeýär. MediaPipe Holistic algoritmi diňe ýüzüň we bedeniň nokatlarynyň anonim koordinatlaryny kesgitleýär we serwere diňe şu sanly maglumatlar iberilýär.
Geljekde Google beýleki dünýä el hereketleri dillerini hem goldamagy we emeli aňy jogap hökmünde el hereketleri bilen wideo habarlaryny döretmäge öwretmegi meýilleşdirýär.
ORIENT
