Owganystan türkmen gazyny göni satyn alyp başlar
«Türkmengaz» döwlet konserni bilen Owganystanyň «Afghan Gas» döwlet korporasiýasy Turgundy serhetýaka (Hyrat welaýaty) nokadynda özara düşünişmek hakynda Ähtnama gol çekdiler. Dabara 10-njy awgust, duşenbe güni türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Owganystanyň Ministrler Kabinetiniň Başlygynyň ykdysady meseleler boýunça orunbasary Abdul Gani Baradaryň gatnaşmagynda geçirildi.
Bu resminama TOPH gaz geçirijisi taslamasynyň çäklerinde gazanylan ylalaşyklary has anyklaşdyrýar we türkmen tebigy gazynyň owgan sarp edijilerine göni iberilmegine başlamagyň täjirçilik hem-de infrastruktura binýadyny döredýär.
Ähtnama laýyklykda, taraplar Hyrat welaýatynda gaz paýlaýyş we gaz geçiriji ulgamlaryna degişli infrastruktura desgalaryny bilelikde gurmak barada ylalaşdylar.
Türkmenistandan göni iberiljek gazyň hasabyna ýerli senagat kärhanalaryny, elektrik stansiýalaryny, ýaşaýyş jaýlaryny we durmuş maksatly desgalary ekologiýa taýdan arassa ýangyç bilen üpjün etmek meýilleşdirilýär.
Owganystanyň «Ariana News» habarlar agentliginiň Premýer-ministriň orunbasarynyň diwanyna salgylanyp habar bermegine görä, Ähtnama türkmen gazynyň amaly taýdan ulanylmagynyň esasy mehanizmlerini kesgitleýär. Hususan-da, resminamada satyn alynjak gazyň möçberleri, ýangyjyň Owganystanyň energetika ulgamynyň içinde paýlanyş tertibi, şeýle hem bahanyň kesgitleniş tertibi düzgünleşdirilýär.
Ýokary derejedäki gepleşikleriň amaly netijeleriniň biri hökmünde iki ýurduň ýokary wezipeli adamlaryň ýolbaşçylygynda ýörite tehniki komiteti döretmek barada ylalaşyk gazanyldy.
Täze dörediljek düzüm birnäçe strategik başlangyçlaryň durmuşa geçirilişine gönüden-göni gözegçilik eder: TOPH gaz geçirijisiniň gurluşygyna, TOP elektrik geçirijisiniň we optiki-süýümli aragatnaşyk ulgamynyň gurluşygyna we demir ýol ulaglary pudagyndaky taslamalara.
Bilelikdäki tehniki komitetiň döredilmegi ýüze çykýan guramaçylyk we inženerçilik meselelerini dessin çözmäge, şeýle hem esasy taslamalaryň ählisiniň yzygiderli we has netijeli durmuşa geçirilmegini üpjün etmäge mümkinçilik berer.
