Näme üçin smartfonyň ýady täze programmalar gurulmasa-da kem-kemden dolýar
Ulanyjy täze programmalary gurmaýan ýa-da köp mukdarda suratdyr wideo saklamaýan hem bolsa, wagtyň geçmegi bilen smartfonda boş ýadyň möçberi kemelip biler. Munuň esasy sebäbi operasion ulgamy we gurnalan programmalar tarapyndan döredilýän hyzmat maglumatlarynyň ýygnanmagydyr.
Bu barada RTU MIREA-nyň gurallaryň we amaly programma üpjünçiligi kafedrasynyň uly mugallymy Andreý Rybnikow gürrüň berdi.
Onuň sözlerine görä, köp ulanyjy täze suratlaryň, wideolaryň we programmalaryň sanynyň ep-esli artmandygyna garamazdan, smartfonyň boş ýadynyň kem-kemden azalýandygyny belleýär. Bu enjamyň näsazlygyny aňlatmaýar. Içki ýadyň ep-esli bölegi operasion ulgamy hem-de gurnalan programmalar tarapyndan döredilýän hyzmat maglumatlary bilen doldurylýar.
Ähli programmalar diýen ýaly keş (cache) diýlip atlandyrylýan wagtlaýyn faýllary döredýär. Bu faýllar programmalaryň has çalt açylmagyna we şol bir maglumatlaryň gaýtadan ýüklenmezligine kömek edýär. Messenjerler suratlary, wideolary, ses habarlaryny we suratlaryň kiçeldilen nusgalaryny, brauzerler girilen sahypalaryň maglumatlaryny, nawigasiýa hyzmatlary bolsa öň görlen kartalary saklaýar. Wagtyň geçmegi bilen şeýle maglumatlaryň möçberi onlarça gigabaýta çenli artyp biler.
Mundan başga-da, programmalar ulanyş döwründe gözleg taryhyny, iş žurnallaryny, ulanyjy sazlamalaryny, oflaýn mazmuny we ätiýaçlyk nusgalaryny hem ýygnap barýar. Netijede, ilkinji gezek gurlanda birnäçe ýüz megabaýt ýer eýelän programma bir ýyl işjeň ulanylandan soň birnäçe esse ulalyp biler. Ýady iň çalt doldurýan programmalaryň hatarynda messenjerler, sosial torlar we wideo akym hyzmatlary bar.
Suratlar bilen işlenilende hem goşmaça ýat gerek bolýar. Smartfon diňe bir asyl suratlary saklaman, eýsem olaryň kiçeldilen nusgalaryny döredýär, media kitaphanasyny gözleg üçin indeksleýär, ýüzleri, teksti we dürli obýektleri tanamak üçin hyzmat faýllaryny emele getirýär. Bu faýllar hem içerki ýatda belli bir möçberde ýer tutýar.
Operasion ulgamynyň täzelenmeleri gurnalanda-da goşmaça ýat ulanylýar. Smartfon gurnama faýllaryny ýükläp alýar, käbir bölekleri wagtlaýyn saklaýar we täzelenmäni üstünlikli tamamlamak üçin zerur maglumatlary döredýär. Täzelenme tamamlanandan soň bu maglumatlaryň aglaba bölegi awtomatiki ýagdaýda pozulýar.
Eger boş ýadyň möçberi çalt azalyp başlasa, hünärmen smartfonyň «Ýat» (Storage) bölümine girip, diňe bir programmalaryň göwrümini däl, eýsem olaryň ýygnan maglumatlarynyň möçberini hem barlamagy maslahat berýär. Ilki bilen messenjerlere, brauzerlere, nawigasiýa programmalaryna we wideo hyzmatlaryna üns bermek, gereksiz faýllaryň awtomatiki ýüklenmegini öçürmek hem-de könelen oflaýn mazmuny pozmak maslahat berilýär.
