Perplexity Personal Computer atly emeli aň agenti Windows ulgamy üçin elýeterli boldy
Perplexity kompaniýasy Windows 10 we 11 ulanyjylary üçin ýerli işleýän Personal Computer emeli aň agentini işe girizdi. Ozal bu gural diňe macOS ulgamy üçin elýeterli bolsa, indi bolsa şahsy kompýuterler üçin iň giňden ulanylýan operasion ulgam bolan Windows-da hem elýeterlidir. Hyzmaty tapgyrlaýyn ornaşdyrmak eýýäm tölegli abunaçylaryň arasynda başlandy.
Adaty emeli aň hyzmatlaryndan tapawutlylykda, agent ulanyjynyň enjamynda gönüden-göni işleýär. Bu bolsa oňa ýerli resminamalar, elektron tablisalar, taslama bukjalary we gurnalan programmalar bilen işlemäge mümkinçilik berýär. Şeýle maglumatlara adaty bulut esasly hyzmatlaryň elýeterliligi ýok. Gural özbaşdak sanly kömekçi hökmünde zerur faýllary tapyp, Excel tablisalaryndaky maglumatlary täzeläp, tanyşdyryş taýýarlap, internetden maglumatlary ýygnap we jemleýji hasabaty taýýarlap biler.
Personal Computer agentiniň esasy artykmaçlygy onuň Windows-daky ýerli iş gurşawyny, Microsoft 365 bulut hyzmatlaryny we web çeşmelerini bir gepleşikde birleşdirip bilmegidir. Bu ädim Perplexity ekoulgamynyň ösüşiniň logiki dowamy bolup, maý aýynda Microsoft Teams bilen amala aşyrylan integrasiýadan soňky nobatdaky tapgyr hasaplanýar.
Işläp düzüjiler howpsuzlyk meselelerine aýratyn üns berýärler. Agent möhüm amallary — e-poçta ibermegi, faýllary üýtgetmegi ýa-da pozmagy — ýerine ýetirmezden öň ulanyjydan hökmany suratda tassyklama soraýar. Mundan başga-da, ýerli maglumatlar emeli aň modellerini öwretmek üçin ulanylmaýar.
Ilkinji tapgyrda Perplexity Personal Computer korporatiw müşderiler we Max hem-de Enterprise Max nyrhnamalaryna ýazylan ulanyjylar üçin elýeterli edildi.
ORIENT
