Türkmenistanda Alžiriň täze Ilçisi Boumediene Guennad akkreditirlendi
Prezident Serdar Berdimuhamedowyň tabşyrygy boýunça Mejlisiň Başlygy Dünýägözel.Gulmanowa Alžir Halk Demokratik Respublikasynyň Türkmenistanda täze bellenilen Adatdan daşary we Doly ygtyýarly Ilçisi (oturýan ýeri Ankara ş.) Boumediene Guennaddan ynanç hatyny kabul etdi.
Milli parlamentiň ýolbaşçysy diplomaty jogapkärli wezipä bellenilmegi bilen döwlet Baştutanynyň adyndan gutlady. Ilçi Alžir Halk Demokratik Respublikasynyň Prezidenti Abdelmajid Tebbunyň Prezident Serdar Berdimuhamedowa iberen mähirli salamyny we ähli türkmen halkyna iň gowy arzuwlaryny ýetirdi. Duşuşygyň dowamynda diplomat ýurduň parahatçylyk söýüjilikli daşary syýasatynyň esasy ugurlary bilen tanyşdy we Aşgabadyň Afrika yklymynyň döwletleri bilen gatnaşyklary işjeň ösdürmäge uly ähmiýet berýändigini nygtady.
Şeýle hem şol gün Türkmenistanyň Daşary işler ministrliginde Alžiriň Türkmenistandaky diplomatik wekilhanasynyň täze ýolbaşçysy bilen daşary işler ministriniň orunbasary Mähri Bäşimowanyň arasynda duşuşyk geçirildi. Onuň dowamynda Ilçi ynanç hatlarynyň nusgalaryny gowşurdy.
Taraplar ikitaraplaýyn gatnaşyklary ösdürmegiň geljekki ugurlaryny jikme-jik ara alyp maslahatlaşdylar. Olar daşary işler ministrlikleriniň arasyndaky yzygiderli geňeşmeleriň geçirilmegini we ýokary derejeli saparlaryň hem-de duşuşyklaryň guralmagyny özara dialogy has-da çuňlaşdyrmagyň esasy şerti hökmünde bellediler. Şeýle hem halkara guramalarynyň, ilkinji nobatda Birleşen Milletler Guramasynyň çägindäki utgaşykly hyzmatdaşlyk, parlamentara gatnaşyklary ýola goýmak hem-de şertnama-hukuk binýadyny giňeltmek ikitaraplaýyn hyzmatdaşlygyň ileri tutulýan ugurlarynyň hatarynda görkezildi.
Hyzmatdaşlygyň ykdysady ugry iki ýurduň işewür toparlarynyň Aşgabatda we Alžirde geçirilýän halkara sergilere hem-de işewürlik forumlaryna işjeň gatnaşmagyny öz içine alýar. Bilelikdäki taslamalary durmuşa geçirmek üçin iň geljegi uly ugurlar hökmünde oba hojalygy we dokma senagaty görkezildi. Mundan başga-da, diplomatlar medeni-ynsanperwer gatnaşyklary işjeňleşdirmäge, bilim maksatnamalaryny durmuşa geçirmäge, ýokary okuw mekdepleriniň arasynda tejribe alyşmaga, şeýle hem sport we syýahatçylyk ulgamlarynda hyzmatdaşlygy ösdürmäge özara gyzyklanma bildirýändiklerini tassykladylar.
