Eplenýän iPhone Ultra 2026-njy ýylda bazaryň öňdebaryjylaryndan birine öwrülip biler
Bazara çykandan soň, eplenýän iPhone Ultra 2026-njy ýylda dünýäniň eplenýän smartfonlar bazarynyň takmynan 25%-ini eýeläp biler.
Apple ikinji orna çykyp biler
Seljerijileriň çaklamalaryna görä, Samsung eplenýän smartfonlar bazarynda öňdebaryjy ornuny saklap galar. Şeýle-de bolsa, kompaniýanyň bazar paýy 2025-nji ýyldaky 40%-den 2026-njy ýylda 32%-e çenli peselip biler.
Çaklamalara görä, ilkinji eplenýän smartfonyny hödürlejek Apple bazara giren badyna 25% paý bilen ikinji orny eýelär. Şeýlelikde, ol paýy 30%-den 24%-e çenli azaljak diýlip garaşylýan Huawei-den birneme ýokary bolar.
Şol bir wagtyň özünde, Motorola-nyň bazar paýy 12%-den 8%-e, Honor-yňky bolsa 7%-den 3%-e çenli peselip biler. Beýleki öndürijileriň paýy bolsa 11%-den 8%-e çenli azalar.
Eplenýän enjamlaryň bazary ösmegini dowam etdirer
Counterpoint Research kompaniýasynyň çaklamasyna görä, Apple kompaniýasynyň ilkinji eplenýän smartfonynyň satuwa çykarylmagy 2026-njy ýylda dünýäde eplenýän enjamlaryň iberilişiniň ýyllyk hasapda 21% artmagyna we bu ugurdaky bäsdeşligiň güýçlenmegine ýardam eder.
Bilermenleriň bellemegine görä, emeli aň tehnologiýalarynyň ösmegi bilen uly eplenýän ekranly enjamlara bolan isleg has-da artar. Şeýle smartfonlar resminamalar bilen işlemek, mazmuny redaktirlemek, iş tertibini dolandyrmak hem-de maglumatlary dürli programmalaryň arasynda geçirmek ýaly gündelik işleri has amatly ýerine ýetirmäge mümkinçilik berer.
