Türkmenistanly ussatlar we dizaýnerler Kazanda geçirilýän V Halkara etnofestiwalyna gatnaşýarlar
MEDENIÝET, 23-nji iýul | ORIENT. Kazan şäherinde «Durmuş stili – Medeniýet kody» atly V Halkara etnofestiwaly öz işine başlady. Özboluşly ussatlyk merkezinde geçirilýän iri medeni çäre Russiýanyň sebitlerinden we daşary ýurtlardan gelen senetçileri, suratkeşleri hem-de moda dizaýnerlerini bir ýere jemledi. Gatnaşyjylaryň hatarynda Türkmenistandan gelen ussatlar hem bar.
22–26-njy iýul aralygynda festiwalyň çäginde awtorlyk el işleriniň giň gerimli etno-bazary guraldy. Bu ýerde türkmen senetçileri beýleki daşary ýurtly gatnaşyjylar bilen birlikde özboluşly el işlerini hödürleýärler. Myhmanlar diňe bir milli önümleri satyn almak bilen çäklenmän, eýsem ýörite ussatlyk sapaklarynyň üsti bilen gadymy senetçilik däpleri bilen hem tanyşýarlar.
Festiwalyň maksatnamasy birnäçe möhüm ugry öz içine alýar:
Moda görkezilişleri: 22-nji- 24-nji iýul aralygynda podiumda Aziýa, Afrika we GDA ýurtlaryndan 45-den gowrak dizaýeriň kolleksiýalarynyň görkezilişleri geçýär. Türkmen milli nagyşlary we milli öwüşginli bezelen dizaýnlar hindistandanly, katarly, marokkoly, özbegistanly we gazagystanly dizaýerleriniň işleri bilen birlikde etno-moda görkezilişlerine utgaşykly girizilendir.
Işewürlik maksatnamasy: 23–25-nji iýul aralygynda geçirilýän bilermenler maslahatlarynda halk çeperçilik senetlerini gorap saklamak, milli nagyşlary häzirki zaman dizaýnyna ornaşdyrmak, döredijilik pudaklaryny hem-de etnobrendleri ösdürmek meseleleri ara alnyp maslahatlaşylýar.
Türkmen ussatlarynyň Kazandaky halkara etnofestiwalyna gatnaşmagy dünýä jemgyýetçiliginiň Türkmenistanyň özboluşly amaly-haşam sungatyna we dokmaçylyk däplerine bolan gyzyklanmasynyň barha artýandygyny görkezýär.
