Serdar Berdimuhamedow Tbiliside Türkmenistan bilen Gruziýanyň hyzmatdaşlygynyň esasy ugurlaryny kesgitledi
Türkmenistanyň Prezidenti Serdar Berdimuhamedowyň Gruziýa döwlet saparynyň dowamynda ikitaraplaýyn gatnaşyklaryň täze strategik derejä çykarylmagy, «Hazar deňzi — Gara deňiz» multimodal ulag geçelgesiniň işe girizilmegi hem-de iri göwrümli bilelikdäki taslamalaryň durmuşa geçirilmegi esasy ara alnyp maslahatlaşylan meseleler boldy. Döwlet Baştutanynyň bu saparynyň ýurtlaryň arasynda diplomatik gatnaşyklaryň ýola goýulmagynyň şanly senesine gabat gelmegi hem aýratyn ähmiýete eýedir. Türkmenistan bilen Gruziýanyň arasynda diplomatik gatnaşyklar mundan 34 ýyl ozal, 1992-nji ýylyň 16-njy iýulynda ýola goýuldy.
Saparyň birinji gününde «Orbeliani» köşgünde Türkmenistanyň Prezidenti Serdar Berdimuhamedow bilen Gruziýanyň Prezidenti Mihail Kawelaşwiliniň arasynda gepleşikler geçirildi. Döwlet Baştutanlary ikitaraplaýyn hyzmatdaşlygyň meselelerini giňişleýin ara alyp maslahatlaşdylar. Esasy üns ulag-logistika merkezlerini ösdürmäge hem-de Türkmenistan — Azerbaýjan — Gruziýa — Rumyniýa ugry boýunça halkara ulag geçelgesi başlangyjyny goldamaga gönükdirildi. Serdar Berdimuhamedow gruzin kärdeşi Mihail Kawelaşwilini özi üçin amatly wagtda resmi sapar bilen Aşgabada gelmäge çagyrdy diýip, TDH habar berýär.
Saparyň dowamynda «Expo Georgia» sergi merkezinde Türkmen-gruzin işewürlik forumy geçirildi. Foruma Türkmenistanyň Prezidenti Serdar Berdimuhamedow hem-de Gruziýanyň Premýer-ministri Irakliý Kobahidze gatnaşdy.
Türkmenistanyň Prezidenti Serdar Berdimuhamedow iki ýurduň işewürler toparynyň öňünde çykyş edip, Türkmenistanyň ykdysady ösüşiniň esasy ugurlaryny beýan etdi hem-de bu ugurlaryň gruzin we ýewropaly maýadarlar üçin giň mümkinçilikleri açýandygyny nygtady. Olaryň hatarynda:
Energetika – dünýäde iň iri gaz ýataklarynyň biri bolan «Galkynyş» gaz känini senagat taýdan özleşdirmegiň dördünji tapgyryna badalga berildi. Şol bir wagtyň özünde Hazar deňziniň ýalpaklygynda daşary ýurt maýa goýumlaryny işjeň çekmek boýunça işler dowam etdirilýär.
Ulag-logistika merkezi – Döwlet Baştutany iki ýurduň hususy pudagyny Gruziýanyň Gara deňiz kenarynda türkmen ýük terminalyny gurmak boýunça uly taslamany durmuşa geçirmek üçin tagallalaryny birleşdirmäge çagyrdy.
Dokma önümleriniň eksporty – Türkmenistanda öndürilýän taýýar dokma önümleriniň möçberi ýylda 130 müň tonnadan hem geçýär. Öndürilýän dokma önümleriniň umumy möçberiniň 80 göterime golaýy eksporta iberilýär.
Işewürlik forumynyň çäklerinde «Expo Georgia» sergi merkezinde Türkmenistanyň eksport mümkinçiliklerini görkezýän giň gerimli sergi guraldy. Sergide ýurdumyzyň öňdebaryjy ministrlikleri, şeýle hem Türkmenistanyň Senagatçylar we telekeçiler birleşmesiniň agzalary öz diwarlyklary bilen çykyş etdiler. Olar gruzin hyzmatdaşlaryna ekologik taýdan arassa azyk önümlerinden başlap, gurluşyk materiallaryna we elektrik tehnikalaryna çenli ýokary hilli önümleriň giň görnüşini hödürlemäge taýýardyklaryny mälim etdiler.
