Aşgabat — Waşington: ABŞ-nyň senatory Stiw Deýns ýokary döwlet derejesinde kabul edildi
ABŞ-nyň Senatynyň Energetika we tebigy serişdeler boýunça komitetiniň agzasy Stiw Deýnsiň Aşgabada resmi sapary ýokary döwlet derejesindäki duşuşyklar bilen tapawutlandy. Amerikaly senator Türkmenistanyň Prezidenti Serdar Berdimuhamedow hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan kabul edildi.
Duşuşyklaryň dowamynda senator ABŞ-nyň Prezidenti Donald Trampyň ýurduň ýolbaşçylaryna iberen mähirli salamyny we iň gowy arzuwlaryny ýetirdi. Türkmen tarapy hem öz gezeginde amerikan Liderine iň gowy arzuwlaryny beýan etdi we Amerikanyň Birleşen Ştatlarynyň Garaşsyzlygynyň şanly 250 ýyllygy mynasybetli ABŞ-nyň halkyny tüýs ýürekden gutlady.
Türkmenistanyň Prezidenti Serdar Berdimuhamedow bilen geçirilen duşuşykda taraplar döwletleriň arasyndaky syýasy dialogyň ýokary depginde eýe bolandygyny bellediler. Munuň üçin möhüm esaslaryň biri hökmünde Türkmenistanyň döwlet Baştutanynyň «Merkezi Aziýa + ABŞ» (C5+1) formatyndaky sammite gatnaşmak üçin Waşingtona amala aşyran sapary, şeýle hem şu ýylyň fewral aýynda türkmen halkynyň Milli Lideriniň ABŞ-nyň Florida ştatyna amala aşyran sapary görkezildi.
Prezident Serdar Berdimuhamedow Waşingtona Türkmenistanyň oňyn hemişelik Bitaraplyk syýasatyna we onuň BMG-niň meýdançasyndaky döredijilikli başlangyçlaryna yzygiderli goldaw berýändigi üçin minnetdarlyk bildirdi. Serdar Berdimuhamedow söwda-ykdysady ugur barada aýdyp, Aşgabadyň ýangyç-energetika toplumy, ulag ulgamy boýunça hyzmatdaşlygy giňeltmäge, şeýle hem maliýe-bank pudagynda, öňdebaryjy tehnologiýalar we emeli aň ulgamynda bilelikdäki taslamalary durmuşa geçirmäge taýýardygyny tassyklady.
Şeýle hem Stiw Deýns Türkmenistanyň Halk Maslahatynyň Başlygy Gurbanguly Berdimuhamedow bilen giňişleýin gepleşikleri geçirdi. Türkmen halkynyň Milli Lideri türkmen bazarynda köp ýyllaryň dowamynda işleýän “Boeing”, “General Electric”, “John Deere”, “Case New Holland” ýaly iri amerikan kompaniýalarynyň işine ýokary baha berdi. Olaryň tehnikalary we tehnologiýalary milli ykdysadyýetiň esasy pudaklaryny döwrebaplaşdyrmak işlerinde netijeli ulanylýar.
Taraplar strategik hyzmatdaşlygyň esasy ugurlary hökmünde energetika we ulag pudaklaryny aýratyn bellediler. Duşuşykda ABŞ-nyň Türkmenistan — Owganystan — Pakistan — Hindistan (TOPH) transmilli gaz geçiriji taslamasyna we Gündogar — Günbatar we Demirgazyk — Günorta ugurlary boýunça Ýewraziýa logistika geçelgelerini döretmek başlangyçlaryna berýän goldawyna ýokary baha berildi.
Duşuşygyň dowamynda senator sport ulgamyndaky umumy bähbitlere hem ünsi çekdi. Ol Gurbanguly Berdimuhamedowyň Türkmenistanda golf sportuny ösdürmäge aýratyn üns berýändigini belledi. Bu ugurdaky başlangyçlaryň ABŞ-daky bu oýnuň köp sanly muşdaklarynyň arasynda uly gyzyklanma döredýändigi nygtaldy.
Duşuşyklaryň dowamynda iki halkyň arasyndaky özara ynamyň binýady hökmünde medeni we ynsanperwer gatnaşyklary ösdürmegiň ähmiýeti bellenildi. Şol sanda “Medeni mirasy gorap saklamak üçin ilçiniň gaznasy” maksatnamasy hem-de bilim ulgamyndaky aragatnaşyklar ynsanperwer köprüleriň möhüm bölegi hökmünde görkezildi.
