Türkmenistan we Azerbaýjan hyzmatdaşlygyň esasy ugurlaryny utgaşdyrýarlar
8-nji iýulda Türkmenistanyň Prezidenti Serdar Berdimuhamedow Aşgabada sapar bilen gelen Azerbaýjan Respublikasynyň ykdysadyýet ministri Mikail Jabbarowy kabul etdi.
Duşuşygyň dowamynda myhman döwlet Baştutanyna Azerbaýjan Respublikasynyň Prezidenti Ilham Aliýewiň mähirli salamyny ýetirdi. Ol şeýle hem Serdar Berdimuhamedowyň şu ýylyň iýun aýynda Baku şäherine amala aşyran döwlet saparynyň iki ýurduň arasyndaky gatnaşyklarynyň taryhynda täze sahypany açandygyny aýratyn belledi.
Gepleşikleriň dowamynda şu ýyl Türkmenistanda geçirilmegi meýilleşdirilýän Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň konsultatiw duşuşygynyň ähmiýeti nygtaldy.
Bu sammitiň geçirilmegi Türkmenistanyň Garaşsyz Döwletleriň Arkalaşygynda başlyklyk edýän döwrüne gabat gelýär. Bu ýagdaý çärä aýratyn geosyýasy ähmiýet berýär we Ýewraziýa giňişliginde köptaraplaýyn ynamy hem-de howpsuzlygy pugtalandyrmak üçin täze mümkinçilikleri açýar.
Duşuşygyň dowamynda taraplar Hökümetara topary iki ýurduň ykdysady mümkinçiliklerini durmuşa geçirmekde esasy utgaşdyryjy gural hökmünde bellediler. Esasy ileri tutulýan ugurlar hökmünde energetika toplumy, ulag we üstaşyr ulgamy, şeýle hem hoşniýetli goňşuçylygyň binýady hökmünde ynsanperwer hyzmatdaşlygyň esaslary görkezildi.
Saparyň çäklerinde Azerbaýjanyň ykdysadyýet ministri Mikail Jabbarow Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow bilen duşuşyk geçirdi.
Daşary syýasat edarasyndaky gepleşiklerde taraplar işewür hyzmatdaşlygy giňeltmek boýunça amaly ädimleri jikme-jik ara alyp maslahatlaşdylar. Edaralarynyň ýolbaşçylary strategik ähmiýetli bilelikdäki taslamalaryň durmuşa geçirilişiniň gidişi barada pikir alyşdylar. Şunda energetika pudagyna we sebit derejesindäki dialog meýdançalarynda garaýyşlary utgaşdyrmak meselelerine aýratyn üns berildi.
