Samsung emeli aňly elýeterli bahaly Galaxy A27 5G smartfonyny tanyşdyrdy
Samsung kompaniýasy meşhur A seriýasynyň dowamy bolan täze Galaxy A27 5G býujet smartfonyny resmi taýdan hödürledi. Täze model öňki görnüşi bilen deňeşdirilende has kuwwatly prosessor, döwrebap dizaýn we emeli aňyň giňeldilen mümkinçilikleri bilen tapawutlanýar. Enjam amatly bahadan ýokary öndürijilikli smartfon gözleýän ulanyjylar üçin niýetlenendir.
Esasy tehniki täzelik hökmünde smartfon Snapdragon 6 Gen 3 çibi bilen enjamlaşdyryldy. Bu prosessor gündelik işleri, mobil oýunlary we köpugurly iş tertibini ýokary derejede ýerine ýetirýär. Smartfon 120 Gs täzeleniş ýygylygy bolan 6,7 dýuýmlyk Super AMOLED ekran bilen üpjün edildi. Enjamyň galyňlygy bary-ýogy 7,8 mm bolup, 12 megapiksellik öň kamerasy ekrandaky kiçijik tegelek deşikde ýerleşdirildi.
Galaxy A27 5G modeliniň esasy artykmaçlygy ozal diňe flagman modellerde bolan ösen emeli aň mümkinçilikleriniň elýeterli bolmagydyr. Circle to Search funksiýasy indi ekranda bir wagtyň özünde birnäçe obýekti tanap bilýär. Object Eraser suratlardan gereksiz bölekleri aňsatlyk bilen aýyrýar, Voice Transcription bolsa sesli gepleşikleri dessine ýazga geçirip, olary 22 dile terjime edýär. Şeýle hem smartfon Google Gemini, Perplexity we Bixby emeli aň kömekçileri bilen doly utgaşykly işleýär.
Täze smartfonyň resmi satuwy 14-nji iýulda başlanar. Bahasy 350 ABŞ dollaryndan başlaýar. Ilkinji tapgyrda enjam diňe gara reňkde hödürlener.
ORIENT
