Türkmen halysynyň baýramy, welosiped ýörişleri we Azerbaýjanyň Medeniýet günleri ýakyn wagtda geçiriljek çäreleriň maksatnamasynda
Anna güni, 22-nji maýda geçirilen Ministrler Kabinetiniň mejlisinde Prezident Serdar Berdimuhamedow milli we halkara senenamasynyň möhüm senelerine bagyşlanan medeni hem-de sport çäreleriniň meýilnamasyna garady.
Maý aýynyň ahyrynyň we tomsuň öňüsyrasynyň esasy wakasy Türkmen halysynyň baýramy mynasybetli geçiriljek dabaralar bolar. Aşgabatda uly göwrümli ýöriteleşdirilen sergi guralar, şeýle-de dünýäniň onlarça ýurdundan belli alymlary, bilermenleri we halyçylyk işi bilen meşgullanýan wekilleri paýtagtymyza ýygnajak Türkmen halyşynaslarynyň bütindünýä jemgyýetiniň XXVI mejlisi geçiriler.
Baýramyň ylmy bölegi tematiki maslahatlar bilen baýlaşdyrylar. Dabaralaryň iň möhüm pursady bolsa Türkmen halysynyň milli muzeýinde ýurdumyzda milli halyçylyk sungatyny ösdürmekde uly hyzmatlary bitiren halyçy zenanlara «Türkmenistanyň at gazanan halyçysy» atly döwlet sylagynyň dabaraly ýagdaýda gowşurylyşy bolar.
Haly forumyndan soň paýtagtymyzda Bütindünýä welosiped güni mynasybetli köpçülikleýin sport çäreleri giň gerim alar. Baýramçylyk marafony eýýäm 30-njy maýda ähli welaýatlarda, Aşgabat we Arkadag şäherlerinde tematiki welosiped yaryşlary, sport bäsleşikleri hem-de ylmy-amaly maslahatlar bilen başlar. 3-nji iýunda bolsa baýramyň esasy wakasy hökmünde paýtagtymyzyň şaýollarynda däp bolan welosiped ýörişi geçiriler.
Iýun aýynyň medeni maksatnamasy ýokary derejeli diplomatik we döredijilik çäreleri bilen tapawutlanar. Paýtagtymyzda Azerbaýjan Respublikasynyň Türkmenistandaky Medeniýet günleri, birnäçe halkara ders olimpiadalary we sergiler geçiriler.
Ýurdumyzyň döredijilik çäreleri ähli welaýatlary öz içine alar: Daşoguz, Lebap we Mary welaýatlarynda “Çalsana, bagşy!” atly abraýly bäsleşigiň jemleýji tapgyrlary geçiriler. Balkan welaýatynda bolsa Medeniýet we sungat işgärleriniň hem-de Magtymguly Pyragynyň şygryýet güni mynasybetli däp bolan Medeniýet hepdeligi guralar.
Çäreleriň senenamasynda “akylly” Arkadag şäheriniň üç ýyllygy mynasybetli dabaralara hem aýratyn orun berler.
Hormatly Prezidentimiz Serdar Berdimuhamedow her bir çäräniň ýokary guramaçylyk derejesinde geçirilmegini tabşyryp, olaryň sagdyn durmuş ýörelgesini hem-de halkymyzyň baý medeni mirasyny wagyz etmekdäki ähmiýetini aýratyn nygtady.
