GDA-nyň sammitine gatnaşmak üçin Gyrgyzystanyň Ministrler Kabinetiniň Başlygy Aşgabada geldi
Gyrgyz Respublikasynyň Ministrler Kabinetiniň Başlygy – Prezidentiň Diwanynyň ýolbaşçysy Adylbek Kasymaliýew 21-nji maýda iş sapary bilen Türkmenistanyň paýtagtyna geldi. Gyrgyzystanyň Hökümet ýolbaşçysynyň saparynyň esasy maksady — ertir, 22-nji maýda Aşgabatda başlanjak GDA agza döwletleriň Hökümet Baştutanlarynyň Geňeşiniň nobatdaky mejlisine gatnaşmakdan ybaratdyr.
Garaşylýan giň gerimli forumyň çäklerinde Arkalaşygyň giňişliginde köptaraplaýyn söwda-ykdysady we medeni-ynsanperwer hyzmatdaşlygyň esasy ugurlaryna jikme-jik seretmek meýilleşdirilýär. Mundan başga-da, Adylbek Kasymaliýewiň Aşgabatdaky iş maksatnamasynyň çäginde Türkmenistanyň ýokary ýolbaşçylary bilen birnäçe ikitaraplaýyn duşuşyklary meýilleşdirilip, olaryň dowamynda iki ýurduň arasyndaky döwletara gatnaşyklary berkitmegiň geljegi uly ugurlary ara alnyp maslahatlaşylar.
