2021–2025-nji ýyllary öz içine alýan 14-nji bäşýyllyk meýilnamasynyň dowamynda Hytaýyň merkezi döwlet kärhanalary Sinszýan-Uýgur awtonom etrabynyň ösüşine uly möçberde maýa goýumlaryny gönükdirdiler. Pekinde çap edilen resmi maglumatlara görä, ýurduň demirgazyk-günbatarynda ýerleşýän bu sebite goýlan maýa goýumlarynyň umumy möçberi 1,1 trillion ýuana ýetdi. Bu bolsa takmynan 159 milliard ABŞ dollaryna deňdir.

Soňky bäş ýylyň dowamynda döwlet kompaniýalarynyň bu sebitdäki işjeňliginden alnan operasion girdeji 6,2 trillion ýuana ýetdi. Şonuň bilen birlikde diňe 2025-nji ýylda goýlan maýa goýumlarynyň möçberi 265,7 milliard ýuany düzdi. Şeýle işjeň ykdysady hereketleriň netijesinde Sinszýan sebitinde 107 müň täze iş orny döredildi.

Sebitiň senagat taýdan goldanylmagyna bagyşlanan ýörite maslahatda 2026-njy ýylda merkezi döwlet kärhanalarynyň bu sebitdäki gatnaşygyny has-da giňeltmegi meýilleşdirýändigi bellenildi. Olaryň arasynda eýýäm 92 sany täze taslamany durmuşa geçirmek boýunça meýiller baradaky teswirnama gol çeken 18 sany iri döwlet korporasiýasy bar.

Bu başlangyçlar energetika we mineral serişdeleri gazyp almak ýaly möhüm ugurlary öz içine alýar. Mundan başga-da, hasaplaýyş tehnikanyň ösüşine hem-de döwrebap maşyn gurluşygyna aýratyn üns berler.

Şeýlelikde, döwlet kärhanalary sebitiň ykdysady taýdan mundan beýläk-de gülläp ösmegine gönükdirilen birnäçe iri möçberli wezipeleriň ýerine ýetirilişini çaltlandyrmagy maksat edinýärler.