25–31-nji ýanwar aralygynda Türkmenistanyň bilim ulgamynyň wekilleri Kembrij şäherinde geçirilýän abraýly hünär kämilleşdiriş okuwlaryna gatnaşýarlar. Bu maksatnama Merkezi Aziýanyň ýokary okuw mekdepleriniň ýolbaşçy düzümi üçin Kembrij uniwersitetiniň Neşir we bahalandyrma bölümi bilen hyzmatdaşlykda guraldy. Bu barada Türkmenistanyň Bilim ministrliginiň resmi saýtynda habar berilýär.

Saparyň esasy maksady — halkara tejribesini milli bilim ulgamyna ornaşdyrmakdan ybaratdyr. Maksatnama PRESETT ulgamy boýunça ýolbaşçylyk ukyplaryny ösdürmäge gönükdirilendir. Bu geljekki mugallymlary taýýarlamagyň häzirki zaman standartydyr we iňlis dilini okatmagy has netijeli hem-de ýokary hilli etmäge ýardam berýär.

Ýokary okuw mekdepleriniň ýolbaşçylary nämeleri öwrenýärler?

Okuw modullary häzirki zaman bilim ulgamynyň iň wajyp ugurlaryny öz içine alýar:

• Ýokary okuw mekdeplerinde dolandyryş we ýolbaşçylyk ukyplaryny kämilleşdirmek.

• Iňlis dilini okatmagyň innowasion usullaryny öwrenmek.

• Bilimi sanlylaşdyrmak we bilimleri bahalandyrmagyň häzirki zaman ulgamlaryny ornaşdyrmak.

• Täze nesil okuw maksatnamalaryny işläp taýýarlamak.

Saparyň ilkinji netijeleri

Ilkinji modullaryň dowamynda türkmen hünärmenleri okatmagyň özgertmeleri we okuw işleriniň monitoring usullary barada pikir alyşdylar. Gatnaşyjylar Kembrijiň tejribesini seljerip, ony Türkmenistanyň ýokary okuw mekdeplerine uýgunlaşdyryp boljak ileri tutulýan ugurlary kesgitlediler. Sanly özgertmeleriň mugallymçylyk ulgamynyň işgärlerini taýýarlamagy çaltlandyrmakdaky orny aýratyn üns merkezinde boldy.

Kembrij ýaly dünýäniň öňdebaryjy bilim merkezleri bilen hyzmatdaşlyk ýurduň içinde talyplaryň bilim derejesiniň ýokarlanmagyna gönüden-göni täsir edýär. Bu halkara talaplaryna laýyk gelýän bilimli we ukyply hünärmenleri taýýarlamaga mümkinçilik berýär, bu bolsa Türkmenistanyň Prezidentiniň döwlet syýasatynyň ileri tutulýan ugurlarynyň biridir.

ORIENT