Amerikanyň Micron Technology kompaniýasy Ýaponiýanyň günbatar sebitinde täze zawod gurmak üçin 1,5 trln ýen (takmynan 9,6 mlrd dollar) maýa goýýar. Täze kärhana ýokary geçirijilikli ýat mikroshemalaryny (HBM) öndürmäge ýöriteleşer, olaryň özi bolsa Nvidia ýaly kompaniýalaryň peýdalanýan ýörite AI tizlendirijileri üçin möhüm bölek hasaplanýar.

Gurluşyk 2026-njy ýylyň maýynda Micronyň Hirosimadaky bar bolan zawodynyň çäginde başlar. Täze meýdançadan HBM çipleriniň 2028-nji ýylda iberilip başlanmagyna garaşylýar.

Micronyň bu taslamasy özüniň ýarymgeçirijiler pudagyny dikeltmäge çalyşýan Ýaponiýa üçin strategiki ähmiýete eýe. Ýurduň ykdysadyýet, söwda we senagat ministrligi (METI) gurluşyk üçin 500 mlrd ýene (3,2 mlrd dollar) çenli subsidiýa bermegi meýilleşdirýär. Mundan öň hem hökümet Hirosimada Micron-yň önümçiligini giňeltmek üçin 774,5 mlrd ýen bölüp bermäge razylyk beripdi.

Nikkei žurnalynyň maglumatyna görä, Micron öz gezeginde öňdebaryjy çip önümçiligini Taýwandan daşardaky sebitlerde ýerleşdirmegi maksat edinýär, bu bolsa geosyýasy töwekgelçilikleri peseldýär.

Emeli aň pudagynyň çalt ösüşi sebäpli HBM çiplerine bolan isleg barha artyp başlady. Bu ugurda Micron bazaryň öňdebaryjy kompaniýalary — SK hynix we Samsung Electronics — bilen bäsleşýär.

2021-nji ýyldan bäri Ýaponiýa çip senagatynyň ösüşine takmynan 36,5 mlrd dollar gönükdirdi. Täze Micron zawody TSMC we Rapidus taslamalary bilen bilelikde Tokionyň täze nesil çip önümçiliginde tehnologik howpsuzlygyny we öňdebaryjylygyny berkitmek ugrunda giň möçberli strategiýasynyň bir bölegi bolup durýar.

ORIENT