Türkmenistanyň Belarus Respublikasyndaky Ilçihanasynyň binasynda iki senä bagyşlanan diplomatik kabul edişlik geçirildi: Türkmenistanyň Garaşsyzlygynyň 34 ýyllygy we hemişelik Bitaraplygynyň 30 ýyllygy.

Bu çäre mähirli we dostlukly ýagdaýda geçdi we ikitaraplaýyn gatnaşyklaryň häsiýetini nygtady. Belarus Respublikasynyň Milli Ýygnagynyň Respublika Geňeşiniň başlygynyň orunbasary Wladislaw Tatarinowiç hormatly myhman bolup gatnaşdy, bu bolsa çärä ýokary resmi derejäni berdi. Myhmanlaryň arasynda diplomatik wekilhanalaryň, halkara guramalarynyň agentlikleriniň ýolbaşçylary, şeýle hem Belarus Respublikasyny DIM-niň, işewür we akademiki toparlaryň wekilleri bar.

Iki ýurduň döwlet senalarynyň ýerine ýetirilmegi bilen açylan dabara Türkmenistanyň Adatdan daşary we Doly ygtyýarly ilçisi Nazarguly Şagulyýewiň çykyşy bilen dowam etdi.

Ilçi öz çykyşynda goşa baýramçylygyň taryhy ähmiýetini nygtady: “Garaşsyzlyk we hemişelik Bitaraplyk berk binýada öwrüldi we biziň ýolumyzy kesgitleýär –parahatçylygyň, konstruktiw halkara hyzmatdaşlygyň we gülläp ösüşiň ýoly. Biz Türkmenistanyň 2026-njy ýylda Garaşsyz Döwletleriň Arkalaşygynyň başlyklygyny ýene-de bir gezek öz üstüne aljakdygyna buýsanýarys, bu bolsa halkara jemgyýetçiliginiň biziň parahatçylyk söýüji syýasatymyza bolan ynamyny tassyklaýar”.

Ilçi Şagulyýew şeýle hem Belarus bilen özara hormat goýmga we ynama esaslanýan strategik hyzmatdaşlygyň işjeň syýasy dialogdan başlap, ykdysady we ynsanperwer hyzmatdaşlygy çuňlaşdyrmaga çenli ähli ugurlarda yzygiderli ösýändigini nygtady.

Milli Ýygnagyň Respublika Geňeşiniň başlygynyň orunbasary Wladislaw Tatarinowiç Belarusyň Bitarap Türkmenistan bilen dostlukly gatnaşyklaryna ýokary baha berýändigini tassyklady.

Ol Minskiň özara peýdaly hyzmatdaşlygy, esasanam bilim we medeniýet ulgamlarynda mundan beýläk-de işjeň ösdürmäge taýýardygyny belledi. Tatarinowiç Türkmenistanyň GDA-da öňde boljak başlyklygynyň Arkalaşygyň çäklerinde integrasiýa proseslerini çuňlaşdyrmak üçin täze mümkinçilikleri açjakdygyna ynam bildirdi.

Agşam Ilçihana tarapyndan ýörite taýýarlanan wideofilm bilen jemlendi, ol Türkmenistanyň ykdysady we durmuş ugrundaky üstünliklerini, şeýle hem halkara giňişligindäki işjeň parahatçylygy goraýyş ornuny aýdyň görkezdi.

Kabul edişlik furşet bilen tamamlandy, bu bolsa myhmanlara işewür gatnaşyklaryny dowam etdirmäge we belarus-türkmen gatnaşyklaryny mundan beýläk-de ösdürmegiň mümkinçiliklerini ara alyp maslahatlaşmaga mümkinçilik berdi. Bu çäre dostlukly gatnaşyklary berkitmekde möhüm diplomatik hereket bolup, köpugurly hyzmatdaşlygy giňeltmäge özara gyzyklanmalaryny tassyklady.

ORIENT