Biz ýakynlaşmagy ugur edinýäris

Aşgabat, 5-nji oktýabr | ORIENT. Türkmenistanyň Maýa goýum forumy (TIF-2025) tamamlanandan bäri iki hepdeden gowrak wagt geçse-de, guramaçylar häzirki güne çenli gatnaşyjylardan hoşallyk hem-de täsirli seslenmeleri alyp durýarlar.

Dubaýyň Tuimaada Real Estate emläk agentliginiň wekilleri Türkmenistana ýygy-ýygydan gelýän myhmanlardyr. Olar şu ýylyň dowamynda eýýäm üç gezek ýurdumyza geldiler: aprelde – Halkara sergi-ýarmarkasyna (ITSE 2025), awgustda – “KidsExpo: Hemme zat çagalar üçin” atly Halkara sergi-ýarmarkasyna we sentýabrda – Türkmenistanyň Maýa goýum forumyna.

Her bir sapar Tuimaada Real Estate agentliginiň işgärlerinde çuňňur täsir galdyrýar. Kompaniýanyň wekilleriniň belleýşi ýaly, Türkmenistanyň baý medeniýeti, myhmansöýerligi we güýçli depginde ösüşi olaryň ýurdumyz bilen hyzmatdaşlyk we maýa goýumlary giňeltmek islegini güýçlendirýär:

«TIF-2025 gepleşikler, tanyşlyklar we öňden bar bolan hyzmatdaşlyklary berkitmek üçin ajaýyp meýdança boldy. Biz onuň guramaçylyk derejesini we hyzmatdaşlar bilen aragatnaşykda bolmagyň mümkinçiliklerine ýokary baha berdik.

Forum 45 döwletiň 800-e golaý hünärmenini, alymlaryny, bilermenlerini, işewürlerini we maliýe işgärlerini birleşdirdi. Bu giň göwrümli çäre ýene bir gezek Türkmenistanyň özara peýdaly dialoga açykdygyny we parahatçylyk, howpsuzlyk hem-de durnukly ösüş ugrunda ykdysady diplomatiýany ynamly ösdürýändigini görkezdi.

Awazadaky maýa goýum forumy Türkmenistanyň halkara arenasynda işjeň gatnaşyjy hökmünde hyzmatdaşlyga gyzyklanma bildirýän taraplar bilen diňe sözde däl, eýsem amaly taýdan-da gatnaşyk gurýandygyny aýdyň görkezdi. Şol bir wagtyň özünde-de ýurt dünýäde resmi taýdan ykrar edilen hemişelik bitaraplyk derejesine daýanyp iş alyp barýar.

Parahatçylyk söýüji syýasaty sebäpli Türkmenistan diňe goňşy ýurtlaryň däl, eýsem has uzakdaky döwletleriň-de bähbitleriniň gabat gelýän merkezi hökmünde özüni görkezýär.

TIF-2025 forumynyň dowamynda Türkmenistan häzirki zaman bilimlerine, innowasiýalara we sanly ulgama daýanyp, dünýä ykdysadyýetinde mynasyp orny eýelemäge çalyşýandygyny görkezdi.

Türkmenistan ykdysady diplomatiýanyň netijeli guralyna öwrülen ajaýyp meýdançany döretmegi başardy. Bu ýerde diňe bilimler, pikirler we innowasiýalar bilen paýlaşylmaýar, eýsem işewür gatnaşyklary hem işjeň ýola goýulýar. Biz, guramaçylaryň myhmansöýerligine ýokary baha berip, şeýle forumlara gatnaşmaga döredilen mümkinçilik üçin minnetdarlyk bildirýäris we myhmansöýer türkmen topragynda täze netijeli duşuşyklara sabyrsyzlyk bilen garaşýarys».

Tuimaada Real Estate – Dubaýyň iň iri gurluşyk kompaniýalary – Emaar, Nakheel, Aldar we beýlekiler bilen göni hyzmatdaşlyk edýän halkara emläk agentligidir. Kompaniýa emläk maýa goýumlary, ýer, ýaşaýyş jaýlary we söwda emläkleriniň satyn alynmagy boýunça kömek, şeýle hem BAE-de ofisleriň, ammarlaryň we kompaniýalaryň açylmagynda goldaw, kärendä bermek we emläk dolandyryşy boýunça maslahat hyzmatlaryny hödürleýär.

Kompaniýanyň wekilleriniň belleýşi ýaly, Dubaýda maýa goýum etmek diňe iri kompaniýalar üçin däl, eýsem hususy şahslar üçin hem elýeterlidir. Başlangyç tölegiň az mukdary bilen amatly şertlerde garaşaryna töleg mümkinçilikleri bar:

«Dubaý maýa goýumlara, bilime we işewürlige açyk. Emirlikde dünýäniň dürli künjeginden gelen talyplaryň bilim alýan ýüzlerçe okuw edaralary hereket edýär. Bu bolsa geljekki hünärmenler üçin howpsuz we innowasion gurşawda bilim almak, soňra bolsa şol tejribäni we bilimleri Türkmenistanda ulanmak üçin özboluşly mümkinçilikdir. Biz ýurtlarymyzyň hyzmatdaşlygynyň mundan beýläk-de güýçlenjekdigine ynanýarys. Biziň üçin Türkmenistan – işewürligiň we medeniýetiň sazlaşykly utgaşýan, gözelligiň we ylalaşygyň mekanydyr».

Enejan KEPBANOWA

Foto: orient.tm