Türkmenistanyň Halk Maslahatynyň Başlygy Gurbanguly Berdimuhamedow bilen Özbegistanyň Prezidenti gepleşikleri geçirdi
24.04.2025 | 15:15 |
24 -nji aprelde, penşenbe güni Türkmenistanyň Halk Maslahatynyň Başlygy Gurbanguly Berdimuhamedow bilen Özbegistan Respublikasynyň Prezidenti Şawkat Mirziýoýew dar düzümde we resmi wekiliýetleriň gatnaşmagynda gepleşikleri geçirdi.
“Silk Road Samarkand” toplumynyň Kongres merkezinde geçirilen duşuşygyň başynda, türkmen halkynyň Milli Lideri Özbegistanyň Baştutanyna Türkmenistanyň Prezidenti Serdar Berdimuhamedowyň iberen mähirli salamy we iň gowy arzuwlaryny ýetirdi.
Gepleşikleriň dowamynda dostlukly, hoşniýetli goňşuçylyk we strategiki hyzmatdaşlygy mundan beýläk-de ösdürmek hem-de berkitmek bilen baglanyşykly häzirki meseleler ara alnyp maslahatlaşyldy. Özara gatnaşyklaryň ähli ugurlarynda, şol sanda syýasy, parlamentara, söwda-ykdysady, ulag-aragatnaşyk, medeni-ynsanperwer ugurlarda köptaraply hyzmatdaşlygyň depginli ösüşi çuňňur kanagatlanma bilen bellenildi diýip, Özbegistanyň Prezidentiniň web sahypasynda habar berilýär.
“Netijeli dialog ähli derejelerde alnyp barylýar. Hökümetara toparyň mejlisi, işewürlik geňeşi, sebitleýin forumlar, medeniýet günleri, sergiler we beýlekiler yzygiderli geçirilýär. Geçen ýyl özara söwda dolanyşygy 1,1 milliard dollara deň boldy. Paýtagtlarda söwda öýleri döredildi we ýük daşamagyň mukdary artdyrylýar. Ýakyn ýyllarda söwda mukdaryny 2 milliard dollara ýetirmek boýunça öňde wezipeler goýuldy” – diýip, habarda aýdylýar.
Şeýle hem energetika, ulag, oba hojalygy we suw hojalygy hem-de ykdysadyýetiň beýleki pudaklarynda özara peýdaly hyzmatdaşlygyň ösýändigi bellenildi. Bilelikde “Şawat-Daşoguz” serhetýaka söwda zolagy döredilýär. Işjeň sebitara gatnaşyklar ýola goýuldy we medeni-ynsanperwer alyş-çalşygyň maksatnamasynyň uly toplumy durmuşa geçirilýär.
Şu ýyl Hywa şäherinde üçünji sebitara forumyny we Özbegistanda Türkmenistanyň Medeniýet günlerini geçirmek barada ylalaşyk gazanyldy.
Gurbanguly Berdimuhamedow we Şawkat Mirziýoýew sebitleýin hyzmatdaşlygyň gün tertibi, şol sanda “Merkezi Aziýa +” görnüşinde öňde boljak sammitlere we Daşkentde Merkezi Aziýa döwletleriniň Baştutanlarynyň ýedinji konsultatiw duşuşygyna taýýarlyk barada pikir alyşdylar.
Şawkat Mirziýoýew, BMG-niň Baş Assambleýasy tarapyndan Türkmenistanyň başlangyjy bilen yglan edilen Halkara parahatçylyk we ynanyşmak ýylynyň çäginde şu ýylyň dekabrynda Aşgabatda geçiriljek Forumyň şeýle hem beýleki halkara çäreleriň ähmiýetini aýratyn belledi.
Duşuşygyň dowamynda Özbegistanyň Prezidenti türkmen halkynyň Milli Liderine “Hakyda göwheri” atly kitabynyň özbek dilindäki neşirini sowgat berdi.
ORIENT
