Soňky döwürde ABŞ-nyň Milli meteorologiýa gullugy tarapyndan «asyrda bir gezek bolýar» diýip atlandyrylan «Elliott» gomy dünýäniň iň uly we Demirgazyk Amerikanyň iň giň şarlawugy bolan meşhur Niagara şarlawugyna hem täsir etdi. Ol Nýu-Ýork ştatynyň Buffalo şäherinden 27 kilometr uzaklykda ýerleşýär. Bu şäher gom howa hadysasyndan iň köp ejir çekenleriň biri.
Niagara şarlawugy her ýyl millionlarça syýahatçyny özüne çekýän tebigy ajaýyp ýadygärlik bolup, ol Amerikanyň Nýu-Ýork ştatyny Kanadanyň Ontário welaýatyndan bölüp durýar.
Daily Mail neşiriniň habaryna görä, soňky 50 ýylyň iň güýçli gar tupanyndan birnäçe gün soň, buz bilen örtülen tebigy toplumyň üstünde ýagty älemgoşar peýda boldy. Bu hadysa köp sanly syýahatçynyň bu ýere gelmegine sebäp boldy. Şarlawugyň golaýyndaky gezelenç meýdançasy tanalmaz derejede üýtgedi: oturgyçlar, agaçlar we tutawaçlar galyň buz gatlagy bilen örtüldi. Şarlawugyň düýbünde uly buz bölekleri emele geldi.
Niagara şarlawugynyň «doňan» ýaly görünmegine garamazdan, onuň güýçli suw akymy öz ugrunda akmagyny dowam etdirýär. Bu täsin tebigy hadysasy, esasan, üstki suwlaryň doňmagy we suwuň ownuk damjalarynyň buzlaşmagy netijesinde döreýär.
Şarlawukdan her sekuntda 3160 tonna suw akýar, bu bolsa onuň hiç haçan doly doňmagyna ýol bermeýär. Köpçülikleýin habar beriş serişdeleriniň berýän maglumatyna görä, Amerikanyň tarapyndaky şarlawuk taryhda diňe bäş gezek bölekleýin doňdy. Şarlawuga gelen syýahatçylar bu adatdan daşary we owadan tebigy hadysany surata düşürip, ony sosial ulgamlarda paýlaşýarlar.
ORIENT
