Biz ýakynlaşmagy ugur edinýäris

Mary welaýatynyň taryhy-ülkäni öwreniş muzeýinde 2025-nji ýylyň şygary – «Halkara parahatçylyk we ynanyşmak ýylyna» bagyşlanan sergi açyldy. Bu barada «Нейтральный Туркменистан» habar berýär.

Sergä gelen myhmanlara Mary welaýatyndaky taryhy ýadygärlikleriň gazuw-agtaryş işlerinde tapylan tapyndylar görkezilýär: keramikadan ýasalan gap-gaçlar, diwarlaryň bezeg bölekleri, şeýle hem gadymy döwürlere degişli zenanlaryň we çagalaryň egin-eşikleri, kümüşden ýasalan şaý-sepler. Mundan başga-da, sergide häzirki zaman türkmen suratkeşleriniň işleri aýratyn orun eýeleýär.

Tematiki serginiň eksponatlary gadymy siwilizasiýalaryň biri bolan bu sebitiň taryhy barada gürrüň berýär. Mary welaýaty gadymy ýadygärliklere baý mekanyň biri hökmünde tanalýar. Bu ýerde Gadymy Merwiň harabalyklary we Marguş patyşalygynyň iň uly şäheri bolan Goňur-depesiň galyndylary ýerleşýär. Mundan başga-da, bu sebitden Beýik Ýüpek ýolunyň ugurlary geçýärdi.

ORIENT News

Foto: marymuseum.gov.tm