Ženewada Halkara zähmet guramasynyň (HZG) esasy ýyllyk forumy bolan Halkara zähmet maslahatynyň (HZM) 114-nji sessiýasy öz işine başlady. Şweýsariýanyň paýtagtynyň üç sany esasy meýdançasynda, şol sanda Milletler köşgünde 1-12-nji iýun aralygynda guramanyň agzasy bolan 187 döwletiň wekilleri iş bilen üpjünçilik pudagynda täze ählumumy standartlary kemala getirerler. Bu giň gerimli sammitde Türkmenistandan Zähmet we ilaty durmuş taýdan goramak ministri Muhammetseýit Sylapowyň ýolbaşçylygyndaky wekiliýet wekilçilik edýär. Wekiliýetiň düzümine döwlet edaralarynyň, iş berijileriň birleşikleriniň we Kärdeşler Arkalaşyklarynyň Milli merkeziniň wekilleri girdi.
Şu ýyl maslahatyň gün tertibi döwrüň wezipeleri we çagyryşlary bilen kesgitlenildi. Wekilleriň çekişmeleriniň merkezinde — çalt tehnologik ösüş eýýamynda adamyň tutýan orny boldy. Dünýä bileleşigi emeli aňyň ähli ýere ýaýramagy we platforma ykdysadyýetiniň (frilans, sanly hyzmatlar we eltip berme gulluklary) çalt ösmegi şertlerinde, mynasyp zähmeti we durmuş adalatlylygyny nähili üpjün etmelidigi baradaky soraglara jogap gözleýär. Şeýle hem gender deňligi, inklýuziýa we zähmetkeşleriň hukuklaryny goramak baradaky maksatnamalar üns merkezinde galýar.
Sessiýanyň çäklerinde türkmen wekiliýetiniň ýolbaşçysy Muhammetseýit Sylapow Halkara Zähmet Guramasynyň Ýewropa we Merkezi Aziýa boýunça sebit direktory Piter wan Roý bilen iş duşuşygyny geçirdi. Taraplar özara hyzmatdaşlygyň häzirki netijelerini jikme-jik ara alyp maslahatlaşdylar we geljekki taslamalar üçin ugurlary kesgitlediler.
Dialogyň dowamynda bilelikdäki “Ýol kartasynyň” iş ýüzünde durmuşa geçirilmegine aýratyn üns berildi. Türkmenistan we HZG-niň zähmet kanunçylygyny döwrebaplaşdyrmak, önümçilikde saglygy goramak ulgamlaryny kämilleşdirmek, şeýle hem çagalaryň zähmetini we mejbury zähmeti doly aradan aýyrýan halkara konwensiýalarynyň berk berjaý edilmegi boýunça ulgamlaýyn işleri dowam etdirýärler. Geçirilen gepleşikler taraplaryň aýdyňlyk we halkara zähmet standartlaryna hormat goýmak ýörelgeleri esasynda durmuş dialogyny ösdürmäge taýýardyklaryny tassyklady.
