Türkmenistan tomsuň ilkinji gününi giň gerimli we ýakymly dabaralar bilen garşylady. Ýurduň ähli künjeklerinde Çagalary goramagyň halkara gününe bagyşlanan baýramçylyk çäreleri geçirildi. Bu nurana baýramçylygyň başynda Prezident Serdar Berdimuhamedowyň Gutlagy okaldy. Döwlet Baştutany onda ýaş nesliň bagtyýar durmuşy we hemmetaraplaýyn ösüşi üçin şertleri döretmegiň döwlet syýasatynyň ileri tutulýan ugry bolup galýandygyny aýratyn nygtady.

Paýtagtdaky baýramçylyk çäreleriniň esasylarynyň biri «Aşgabat» medeni-dynç alyş seýilgähinde geçirildi. Bu ýerde ýurduň dürli ministrlikleriniň we pudaklaýyn dolandyryş edaralarynyň (Daşary işler, Bilim, Saglygy goraýyş, Sport ministrlikleriniň), Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hem-de Birleşen Milletler Guramasynyň agentlikleriniň tagallalaryny birleşdiren uly inklýuziw dabarasy ýaýbaňlandy.

Dabaranyň resmi bölegi Türkmenistanyň Halk Maslahatynyň Diwanynyň iş dolandyryjysy, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýerine ýetiriji direktory – wise-prezidenti Rejep Bazarowyň, BMG-niň Türkmenistandaky Hemişelik utgaşdyryjysy Dmitriý Şlapaçenkonyň we ÝUNISEF-iň wekilhanasynyň ýolbaşçysy Jalpa Ratnanyň gutlag sözleri bilen açyldy. Çykyş edenler Türkmenistan bilen BMG-niň Çagalar gaznasynyň arasyndaky köp ýyllyk hyzmatdaşlygyň netijelidigini bellediler. Bu hyzmatdaşlygyň baş maksady — her bir çaganyň, aýratyn hem aýratyn howandarlyga mätäç çagalaryň bagtyýarlygy, ýokary hilli bilimi we hemmetaraplaýyn goldanylmagydyr.

Günüň esasy bezegi bolsa, elbetde, döredijilik bölegi boldy. Baýramçylygyň myhmanlary Gurbanguly Berdimuhamedow adyndaky çagalar sagaldyş-dikeldiş merkeziniň hem-de «Jahan» döredijilik merkeziniň ýaş zehinleriniň ajaýyp we ak ýürekden eden çykyşlaryna uly gyzyklanma bilen tomaşa etdiler. Öwüşginli teatr sahnajyklar, joşgunly tanslar we sazly çykyşlar seýilgähiň ýodalaryny uly festiwal meýdançasyna öwürdi.

Guramaçylar ýaş gatnaşyjylar üçin gyzykly interaktiw maksatnamany taýýarladylar: öwrediji wiktorinalar, döredijilik bäsleşikleri, şadyýan oýunlar we sport estafetalary geçirildi. Bu gün çagalara iň esasy zady — aragatnaşygyň ak ýürekden şatlygyny, özüňi görkezmek üçin mümkinçiligi we başlanan tomusky dynç alyş möwsümi üçin uly ruhubelentlik paýlady.