Maryda Türkmenistanyň at gazanan mugallymy Ata Akbabaýewi hormat bilen ýatladylar
Mary şäheriniň ýöriteleşdirilen mekdebinde «Ata Akbabaýew — halypaçylyk mekdebiniň beýik ussady» atly dabaraly çäre geçirildi. Welaýat Baş bilim müdirligi tarapyndan guralan duşuşyk Türkmenistanyň at gazanan bilim işgäri Ata Akbabaýewiň hatyrasyna, döredijiligine we baý mugallymçylyk mirasyna bagyşlandy.
Ata Akbabaýew milli bilim ulgamynyň taryhynda çuň yz galdyran şahsyýetdir. Ol 1991-nji ýylda ýurdumyzda ilkinji gezek geçirilen «Ýylyň mugallymy» bäsleşiginiň ýeňijisi boldy. Mundan başga-da, onuň 1988-nji ýylda milli telewideniýede görkezilen özboluşly açyk sapagy birnäçe nesil mugallymlar üçin nusgalyk boldy.
Ussat mugallymyň türkmen dilini okatmak boýunça tejribesi Bilim ministrligi tarapyndan resmi taýdan öwrenilip, ýurdumyzyň ähli ýerlerine ýaýradyldy. Mugallym mekdep okuw kitaplarynyň, «Mährem mugallym», «Mukaddes ojak» ýaly gymmatly usuly gollanmalaryň we ylmy makalalaryň awtorydyr. Zähmet üstünlikleri üçin ol «Watana bolan söýgüsi üçin» medaly bilen sylaglanyldy.
Çäräniň dowamynda gatnaşyjylar halypanyň şahsy zatlarynyň we işleriniň sergisi bilen tanyşdylar, şeýle hem onuň ömür ýoluna bagyşlanan wideo şekile tomaşa etdiler. Kärdeşleri, okuwçylary we welaýat bilim edaralarynyň ýolbaşçylary Akbabaýewiň usulyýet mekdebiniň häzirki wagtda-da ýaşap gelýändigini bellediler.
Türkmenistanda magaryfçylar dinastiýasynyň üstünlikli dowam etdirilýändigi aýratyn buýsanç döredýär. Ata Akbabaýewiň çagalary we agtyklary onuň ýoluny dowam etdirip, häzirki wagtda mekdeplerde zähmet çekýärler. Görnükli mugallymyň ogly we agtygy ýaş nesli terbiýelemäge bütin ömrüni bagyş eden kakalarynyň we atalarynyň hatyrasyny hormat bilen saklaýandygy üçin döwletimize tüýs ýürekden minnetdarlyk bildirdiler.
ORIENT
