Apple kompaniýasy klawiatura öndürijisiniň “sitrus” nyşany baradaky dawada ýeňiş gazandy
Apple Ýewropanyň Intellektual Eýeçilik boýunça edarasynda (EUIPO) hytaýly klawiatura öndürijisi Yichun Qinningmeng Electronics bilen bolan dawada ýeňiş gazandy. MacRumors-yň habar bermegine görä, kompaniýa aşagyndaky bölekleri klawiatura düwmeleri görnüşinde ýerine ýetirilen sitrus miwesiniň şekili ýerleşdirilen söwda nyşanynyň hasaba alynmagyna garşy çykdy. Düzgünleşdiriji hytaý kompaniýasyna bu logotip boýunça hukuklaryň berilmegini bölekleýin ret etdi, şol bir wagtyň özünde hem miweli nyşanyň hakykatdan-da alma şekiline kän meňzemeýändigini boýun aldy.
Yichun Qinningmeng Electronics mehaniki klawiaturalary we düwmeler üçin gapaklary öndürýän, şeýle hem gün panellerini satýan kompaniýa bolup, sitrus miwesi görnüşindäki logotipi ulanypdy. Miwäniň aşaky bölekleri klawiatura düwmeleri görnüşinde ýerine ýetirilen, ýaşyl ýapragy bolsa Apple logotipindäki ýaly saga däl-de, çepe gönükdirilen. Şeýle-de bolsa, Apple bu nyşanyň dişlenen alma we üzülip alnan ýaprak şekiline meňzeýändigini aýtdy.
EUIPO iki dizaýnyň arasynda “ownuk umumy aýratynlyklaryň” bardygyny ykrar etdi, emma olaryň arasynda köp tapawutlaryň hem bardygyny belläp, nyşanlaryň many taýdan meňzeş däldigi barada netijä geldi. Şeýle-de bolsa, düzgünleşdiriji Apple kompaniýasynyň abraýyny we alyjylaryň nyşanlaryň arasynda baglanyşyk görüp bilmek mümkinçiligini nazara alyp, esasan Apple kompaniýasynyň tarapyny tutdy. Apple sitrus nyşanynyň hytaý kompaniýasyna öz abraýyndan adalatsyz peýdalanmaga mümkinçilik döredip biljekdigini aýtdy. Yichun Qinningmeng Electronics söwda nyşanyny hasaba almak işini dowam etdirip bilmez, emma gün panelleri üçin şol logotipi ulanmak baradaky arzasyna garalar.
