Kazan Kremlinde türkmen halkynyň Milli Lideri bilen Tatarystanyň Raisiniň duşuşygy boldy
«Russiýa – Yslam dünýäsi: KazanForum — 2026» XVII halkara ykdysady forumyna gatnaşmagynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Kazan Kremlinde Tatarystanyň Respublikasynyň Raisi Rustam Minnihanow bilen duşuşdy.
Söhbetdeşligiň dowamynda Rustam Minnihanow Gurbanguly Berdimuhamedowa foruma hormatly myhman hökmünde gatnaşandygy we ýurduň wekiliýetini iberendigi üçin tüýs ýürekden minnetdarlyk bildirdi. Şu ýyl Türkmenistanyň «Kazan Halal Market» ýarmarkasynda iň uly diwarlyklaryň birini goýandygy, forumyň çäklerinde guralan ýurduň sergi ekspozisiýasynyň bolsa Türkmenistanyň kuwwatly ykdysady we eksport mümkinçiliklerini aýdyň görkezýändigi aýratyn bellenildi.
Gurbanguly Berdimuhamedow, öz gezeginde, şu ýyl Kazan şäheriniň «Yslam dünýäsiniň medeni paýtagty» diýlip yglan edilmegi mynasybetli Tatarystanyň ýolbaşçylygyny gutlady. Türkmen halkynyň Milli Lideri IT-ulgamy, sanlylaşdyrmak we maýa goýum hyzmatdaşlygy ýaly meseleleri ara alyp maslahatlaşmakda «KazanForumyň» dünýä derejesindäki meýdança hökmünde abraýynyň barha artýandygyny nygtady.
Gurbanguly Berdimuhamedowyň Russiýanyň Prezidenti Wladimir Putin bilen Kazan Kremlinde geçirilen telefon arkaly söhbetdeşligi duşuşygyň dowamynda özboluşly pursat boldy. Türkmen halkynyň Milli Lideri strategik hyzmatdaşlyk ugruna ygrarlydygyny nygtap, RF-niň Prezidentine mähirli salamyny ýollady.
«Türkmenistan we Russiýa — uzak möhletleýin esasdaky strategik hyzmatdaşlardyr. Men köptaraply özara hyzmatdaşlygymyzy ösdürmek üçin amatly şertleri döredendigi üçin Wladimir Putine minnetdarlygymy bildirýärin» — diýip, Halk Maslahatynyň Başlygy belledi.
Rustam Minnihanow bu üstünlikli gatnaşyklaryň binýadynyň Türkmenistanyň we Russiýanyň Prezidentleriniň tagallalary, şeýle hem türkmen halkynyň Milli Lideriniň köp ýyllyk işiniň netijesinde tutulandygyny tassyklady.
Bu duşuşyk Türkmenistan bilen Tatarstanyň arasyndaky hyzmatdaşlygyň türkmen-rus dialogynyň çäklerinde sebitara gatnaşyklaryň netijeli nusgasydygyny ýene-de bir gezek subut etdi. Taraplar häzirki forumyň ýokary tehnologiýaly pudaklardaky we medeni-ynsanperwer ulgamdaky bilelikdäki taslamalara täze itergi berjegine ynam bildirdiler.
«Russiýa — Yslam dünýäsi: KazanForum» XVII halkara ykdysady forumy 12-17-nji maý aralygynda geçirilýär.
