Adam şekilli robotlar Kanadadaky Toyota zawodynda işe başlady
Toyota RAV4 modelini ýygnamakda Digit androidler gatnaşdy
Toyota kompaniýasynyň Kanadanyň Ontario welaýatyndaky zawodynda adam şekilli Digit robotlary ulanylyp başlandy. Olar Kanada bazary üçin öndürilýän Toyota RAV4 krossoweriniň ýygnalyşynda ulanylýar.
Robotlar ozal kärhananyň işgärleri tarapyndan ýerine ýetirilýän agyr we gaýtalanýan işleri amala aşyrýar.
Robotlaryň önümçilikdäki wezipesi
Digit robotlary esasy logistiki işleri ýerine ýetirýär:
• awtoulag bölekleri ýerleşdirilen konteýnerleri daşamak
• şaýlary ýygnama liniýasyna eltmek
• boş gaplary ýygnamak
Kompaniýa robotlaryň ulanylmagynyň işgärlere düşýän agramy azaltmaga hem-de hünär taýdan ýadawlyk töwekgelçiligini peseltmäge mümkinçilik berýändigini belleýär.
Hyzmatdaşlyk we taslamanyň ösüşi
Taslama Toyota bilen Agility Robotics kompaniýasynyň arasynda şu ýylyň başynda gol çekilen ylalaşygyň çäklerinde amala aşyrylýar.
Häzirki wagtda kärhanada üç robot işleýär, emma geljekde olaryň sanyny artdyrmak meýilleşdirilýär. Mundan başga-da, adamlar bilen robotlaryň arasynda işleri paýlamak üçin emeli aň ulgamyny işläp taýýarlamak dowam etdirilýär.
Pudakdaky ýagdaý
Şuňa meňzeş tehnologiýalary beýleki awtoulag öndürijiler hem synag edýär. Mart aýynda BMW konserni Germaniýanyň Leýpsig şäherindäki zawodynda adam şekilli Aeon robotlary bilen synag taslamasyna başlandygyny habar berdi.
