Küşt boýunça Gran-pri ýaryşynyň «Aşgabat» tapgyrynyň ýeňijileri yglan edildi
Türkmenistanyň paýtagtynda 4-nji maýdan 8-nji maý aralygynda Ýöriteleşdirilen küşt we şaşka mekdebi binasynda 270-den gowrak küştçiniň gatnaşmagynda geçirilen küşt boýunça Gran-pri ýaryşynyň «Aşgabat» tapgyry tamamlandy. Ýaryş milli Küşt federasiýasynyň howandarlygynda şweýsar ulgamy boýunça geçirildi.
Ýaryşyň esasy wakasy aşgabatly küştçi Annamuhammet Hommadowyň uly üstünligi boldy. Ol açyk derejede 9 döwde 9 ýeňiş gazanyp, 100 göterimlik netije görkezdi.
Türkmenabatly Aýa Baýramowa zenanlaryň derejesinde birinji orny eýeläp, üstünlikli çykyş etdi.
«Aşgabat» tapgyrynyň baýrakly orunlary paýtagtyň we Lebap welaýatynyň küşt mekdepleriniň ýokary derejesini doly tassyklady.
Erkekleriň arasynda ikinji orny Aly Ahmedow (Aşgabat) eýeledi, baýrakly orunlaryň üçlügini bolsa Şahruh Turaýew (Türkmenistanyň Küşt federasiýasy) jemledi.
Zenanlaryň arasyndaky birinjilikde Aýa Baýramowadan soňra hormat münberinde Türkmenabadyň ýene bir wekili Mähri Agamyradowa orun aldy, üçünji orny bolsa Aşgabadyň «Küşt älemi» akademiýasyndan Nurana Söýünowa eýeledi.
Ýaryşyň FIDE düzgülerine laýyklykda we halkara reýtinginiň hasaba alynmagy bilen geçirilmegi, halkara meýdançasyndaky täze ýaryşlara taýýar bolan türkmen küştçileriniň ussatlygynyň yzygiderli ösmegini üpjün edýär.
Ýeňijileri sylaglamak dabarasynda ilkinji gezek milli ýygyndy toparyň resmi köýnekjesi tanyşdyryldy. Türkmen küştçileri bu köýnekçede 13-18-nji maý aralygynda Astana şäherinde geçiriljek Türki döwletleriň birinji Küşt olimpiadasynda çykyş ederler.
«Aşgabat» tapgyrynyň netijelerini şu salgydan görüp bilersiňiz: https://s1.chess-results.com/tnr1398186.aspx?lan=11&SNode=S0
