Guançžoudaky Kanton sergisi Hytaýyň eksportyna bolan ynamy berkitdi

Döredijilik, hilli önümler we amatly bahalar bütin dünýäden alyjylaryň ünsüni çekdi.

“CCTV+” habarlar gullugynyň berýän maglumatyna görä, sişenbe güni Guançžouda 139-njy Kanton sergisi tamamlandy. 15-nji aprel bilen 5-nji maý aralygynda dowam eden bu sergi hytaýly gatnaşyjylar üçin hem, daşary ýurtly alyjylar üçin hem örän netijeli boldy. 1,55 million inedördül metr meýdanda 75 700 diwarlyk we 32 000-den gowrak kärhana öz önümlerini görkezdi.

Hytaýly gatnaşyjylar esasy ünsi döredijilige we täzeçillige gönükdirdiler. “Hangzhou Zhu Bingren Copper Art” kompaniýasynyň wekili Ýu Szi, günbatarlylaryň islegine görä şaý-seplere medeni mirasynyň elementlerini goşandyklaryny aýtdy. Ol: “Garaşylyşyndan hem ýokary netije aldyk. Bu sergi bize uly ynam berdi” diýip belledi.

Daşary ýurtly alyjylar hytaý önümlerine ýokary baha berdiler. Amerikaly Raýan Kertis: “Hili meniň garaşanymdan has gowy eken. Maňa hakykatdan hem ýaraýar” diýip, öz pikirini beýan etdi. Ispaniýaly Klaudiýa Gonsales bolsa: “Hytaý önümleri bize ýaraýar, sebäbi olarda baha we hil özara gowy utgaşýar” diýip belledi.

Britaniýaly alyjy Sanni Panesar birnäçe şertnamalaryň üstünde işleýändigini habar berdi. Onuň watandaşy Kreýg Brammel bolsa bu sergini täze pikirleri tapmak üçin çalşyryp bolmajak ählumumy meýdança diýip atlandyrdy.

Hytaý kompaniýalary täze müşderileriň köpelendigini bellediler. “Fujian Homestar Furniture Corporation” kärhanasyndan Lýu Çžunsi ösýän bazarlar we serhetüsti elektron söwda tarapyndan uly gyzyklanma bildirilýändigini nygtady.

Şandun welaýatyndan bolan Çžou Dandan öz kompaniýasyna 200-e golaý alyjynyň ýüz tutandygyny we olaryň üçden iki böleginiň satyn almak niýeti bilen habarlaşmak üçin maglumatlaryny galdyrandygyny habar berdi.

1957-nji ýylda esaslandyrylan Kanton sergisi ýylda iki gezek geçirilýär we Hytaýyň daşary söwdasynyň “barometri” hasaplanýar.