Ählumumy meselelere garamazdan, Hytaý ygtybarly energiýa üpjünçiligi bilen üpjün edýär
Geosyýasy gapma-garşylyklar sebäpli energiýa göterijileriň dünýä bahalarynyň ýokarlanmagyna we ýokary tehnologiýaly pudaklar tarapyndan içerki islegiň artmagyna garamazdan, Hytaý energiýa üpjünçiligi ulgamyndaky ygtybarly çözgütleriň netijesinde şu ýyl elektrik energiýasynyň ýeterlik mukdaryny we durnukly bahalary üpjün etmegi başardy.
Milli statistika býurosy tarapyndan anna güni neşir edilen maglumatlara görä, Hytaýyň umumy gurnalan elektrik energiýasyny öndürmek kuwwaty şu ýylyň birinji çärýegine çenli 4 milliard kilowatta golaýlady. Bu görkeziji dünýäniň umumy göwrüminiň tas 30 göterimine barabar bolup, dünýäde iň uly göwrüm bolmagynda galýar.
Şu ýyl Hytaýyň elektrik üpjünçiligi ulgamynda arassa energiýanyň paýy ep-esli artdy.
Milli statistika býurosynyň beýän maglumatlaryna görä, birinji çärýekde Hytaý boýunça bellenen ölçegden uly bolan senagat kärhanalary arassa energiýa çeşmelerinden, şol sanda gidroenergetikadan, atom energetikasyndan, ýel we gün energiýasyndan 700 milliard kilowatt-sagat elektrik energiýasyny öndürdiler. Bu görkeziji geçen ýylka garanyňda 2,8 göterim köp bolup, olaryň umumy elektrik energiýasyny öndürmek göwrüminiň 33,2 göterimini düzýär.
Bellenen ölçegden uly bolan senagat kärhanalary diýlip, ýyllyk girdejisi 20 million ýuan (2,93 million ABŞ dollary) we ondan köp bolan kärhanalara aýdylýar.
Maglumatlara görä, fewral aýynyň ahyryna çenli Hytaýda gaýdatan dikeldilýän energiýa çeşmeleriniň gurnalan kuwwaty 2,38 milliard kilowatta ýetdi.
«Çaklamalara görä, ýylyň birinji çärýeginde Hytaýda täze gurnalan elektrik öndüriji kuwwatlyklarynyň takmynan 70 göterimi ýel we fotoelektrik (gün) energiýasy ýaly gaýtadan dikeldilýän energeiýa çeşmeleriň paýyna düşdi. Hytaýda täze gurnalan generatorlaryň üçden ikisinden gowragynyň arassa çeşmelerden elektrik energiýasyny öndürýändigini ynamly aýdyp bileris. Biziň energiýa üpjünçiligimiz has bol we ekologiýa taýdan arassa boldy» — diýip, Hytaýyň elektrik energetikasy geňeşiniň statistika we sanly seljeriş departamentiniň direktory Hou Wentszýe belledi.
