Türkmen halkynyň Milli Lideriniň Awstriýa sapary dialog üçin täze mümkinçilikleri açýar
8-nji aprelde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Awstriýa Respublikasyna sapary başlady. Wena amala aşyrylýan bu sapar iki taraplaýyn gatnaşyklarynyň aýratyn derejesini tassyklaýar. Bu ýerde Awstriýa diňe bir möhüm ykdysady hyzmatdaş bolman, eýsem halkara howpsuzlygy we energiýa durnuklylygy ugrunda Türkmenistanyň başlangyçlaryny yzygiderli goldaýan döwlet hökmünde çykyş edýär. Bu hyzmatdaşlygyň esasynda Türkmenistanyň hemişelik Bitaraplyk derejesine çuňňur hormat goýulmagy we onuň Merkezi Aziýada durnuklylygyň şerti hökmünde ykrar edilmegi durýar.
Hyzmatdaşlygyň ykdysady binýady, ylalaşyklary anyk maýa goýum taslamalaryna öwürýän Türkmen-awstriýa bilelikdäki toparynyň işine esaslanýar. Türkmenistanyň senagat ulgamy, aýratyn-da gurluşyk we gaýtadan işleýän senagaty, Awstriýanyň tehnologik innowasiýalaryny işjeň ornaşdyrýar. Awstriýanyň kompaniýalarynyň tejribesi ýurduň iri şäher gurluşyk taslamalarynda ulanylyp, iň ýokary ekologiýa standartlarynyň berjaý edilmegini üpjün edýär. Ulag-logistika pudagynda bolsa, awstriýaly hyzmatdaşlaryň tejribesi Beýik Ýüpek ýoluny gaýtadan dikeltmeginde Türkmenistanyň Ýewraziýanyň esasy ulag merkezine öwrülmeginde aýratyn ähmiýete eýedir.
Sapara saz diplomatiýasynyň nusgasyna öwrülen ynsanperwerlik gatnaşyklary aýratyn öwüşgin berýär. Türkmen-awstriýa jemgyýetiniň we «Galkynyş» türkmen-awstriýa simfoniki orkestriniň bilelikdäki işi, şeýle-de eýýäm däbe öwrülen Aşgabatdaky Wena ballary iki halkyň ruhy taýdan ýakynlaşmagy üçin özboluşly şertleri döredýär. Ylmy-bilim ulgamyndaky hyzmatdaşlyk we ýokary okuw jaýlarynyň arasyndaky göni gatnaşyklar bolsa, hünärmenleri taýýarlamak ulgamyna Ýewropanyň öňdebaryjy usullaryny üstünlikli ornaşdyrmaga mümkinçilik berýär.
Türkmen halkynyň Milli Liderini «Wena-Şwehat» Halkara howa menzilinde mähirli garşy alynmagy ýokary derejedäki ynamy nygtaýar. Bu ynam häzirki saparyň dowamynda energetika ulgamy we “ýaşyl” ykdysadyýete geçiş boýunça täze mümkinçilikleri ara alyp maslahatlaşmak üçin berk esas bolup hyzmat eder.
