Stambulda 59-njy halkara zergärçilik sergisi Istanbul Jewelry Show geçiriler
1–4-nji aprel aralygynda Stambul şäherinde 59-njy halkara zergärçilik sergisi — IJS Istanbul Jewelry Show geçiriler. Çäre Stambul sergiler merkezinde geçiriler we türkmen işewürleri üçin öňdebaryjy öndürijilere hem-de innowasion tehnologiýalara göni elýeterliligi açar.
Türkiýäniň zergärçilik senagaty dünýäde öňdebaryjy orunlary eýeleýär. IJS sergisine gatnaşmak diňe eksponatlary synlamak däl, eýsem işewürligi giňeltmek üçin taýýar çözgütdir. Sergä baryp görmek Türkmenistanyň söwda pudagynyň wekillerine şu mümkinçilikleri berer:
• Altyn, kümüş we gymmatbaha daşlaryň öňdebaryjy brendleri bilen araçysyz şertnamalar baglaşmak.
• Metallary öndürmek we gaýtadan işlemek boýunça öňdebaryjy tehnologiýalar bilen tanyşmak.
• GDA ýurtlarynyň we Ýakyn Gündogaryň bazarlarynda modany kesgitlejek dizaýn hem-de hil standartlaryny görmek.
IJS sergisi 1986-njy ýyldan bäri geçirilýär we dünýäniň iň uly bäş zergärçilik forumynyň hataryna girýär. Ol Gündogar Ýewropadan, Russiýadan, Demirgazyk Afrikadan we Merkezi Aziýadan gatnaşyjylary birleşdirip, hünär taýdan ösüş we maýa goýumlar üçin özboluşly ekoulgamy döredýär. Türkiýe Respublikasynyň Aşgabatdaky ilçihanasy (Söwda geňeşi) bu çäräni eksport mümkinçiliklerini ösdürmek üçin möhüm waka hökmünde maslahat berýär.
Goşmaça maglumat serginiň resmi saýtynda elýeterlidir: www.istanbuljewelryshow.com.
ORIENT
