MHM-niň täze ýolbaşçysy we harby we hukuk goraýjy edaralaryndaky işleriň netijeleri
Aşgabat, 15-nji fewral | ORIENT. Şenbe güni Türkmenistanyň Prezidenti, Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Onda ýurduň harby we hukuk goraýjy edaralarynda 2026-nji ýylyň ýanwar aýynda alnyp barlan işleriň netijelerine seredildi hem-de Türkmenistanyň Milli howpsuzlyk ministrligine täze ýolbaşçy bellenildi.
Döwlet Baştutanynyň Permanyna laýyklykda, Türkmenistanyň milli howpsuzlyk ministri wezipesine general-maýor Döwletgeldi Meredow bellenildi.
Ozal bu wezipäni eýeläp gelen general-maýor Nazar Atagaraýew başga işe geçmegi sebäpli wezipesinden boşadyldy. Gullugyň täze ýolbaşçysynyň öňünde bu düzümiň işini döwrebap derejede kämilleşdirmek boýunça degişli işleri alyp barmak babatda birnäçe anyk wezipeleri goýuldy.
Geçirilen Howpsuzlyk geňeşiniň mejlisi Türkmenistanyň goranyş häsiýetli Harby doktrinasynyň harby gullukçylara ýokary derejeli durmuş goldawy bilen aýrylmaz baglanyşyklydygyny aýdyň görkezdi. Ýanwar aýy giň möçberli dabaralarynyň aýy boldy.
Goranmak ministrligi: Lebap welaýatynda Türkmenistanyň Ýaragly Güýçleriniň harby bölümleriniň täze binalar hem-de desgalar toplumy açyldy.
Içeri işler ministrligi: “Çoganly” ýaşaýyş toplumynda Içeri işler ministrliginiň Mälikguly Berdimuhamedow adyndaky ýaşaýyş jaý toplumynyň nobatdaky tapgyrynyň, Balkan welaýat we Mary welaýat Polisiýa müdirlikleriniň işgärleri üçin 4 gatly, 24 öýli 2 sany döwrebap ýaşaýyş jaýlary açylyp ulanmaga berildi.
Prokuratura we Migrasiýa gullugy: Esenguly we Tejen etraplarynda täze edara binalary ulanmaga berildi.
Serhet gullugy we Gümrük gullugy: täze serhet galasy we Etrek etrabynda gümrükhananyň işgärleri üçin gulluk ýaşaýyş jaýy ulanmaga berildi.
Döwlet Baştutany ýurduň daşary syýasat ugrunyň üýtgewsizdigini tassyklap, “Garaşsyz, hemişelik Bitarap Türkmenistanyň döwlet serhedi goňşy ýurtlar bilen dost-doganlyk serhedidir” nygtady belledi.
Şol bir wagtyň özünde, Türkmenistanyň harby we hukuk goraýjy edaralarynyň ählisinde sanlylaşdyrma hem-de milli kanunçylygy halkara hukugynyň kadalaryna doly laýyk getirmek boýunça işler dowam etdirilýär.
