Tailandyň Patyşasy Türkmenistanyň Ilçisinden ynanç hatlaryny kabul etdi
Türkmenistanyň diplomatik kartasy Günorta-Gündogar Aziýada giňeldilýär. 10-njy fewralda Bangkok şäherinde Tailand Patyşasynyň Köşgünde dabara boldy: Ilçi Muhammetnyýaz Maşalow (oturýan ýeri Kuala Lumpur ş.) Tailandyň Patyşasy Maha Wajiralongkorna ynanç hatlaryny gowşurdy.
Patyşa Maha Wajiralongkorn türkmen Ilçini bu jogapkärçilikli wezipä bellenilmegi bilen gutlap, oňa uly üstünlikleri arzuw etdi we özüniň geljekde Türkmenistana saparynyň amala aşyrmak meýliniň bardygyny nygtap geçdi. Patyşanyň bu gyzyklanmasy — iki döwlet arasyndaky medeni we syýahatçylyk alyş-çalyşyny ösdürmek üçin möhüm yşarat bolup durýar.
Ilçi Türkmenistanyň Prezidenti Serdar Berdimuhamedowyň we Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyndan Tailandyň Patyşasyna mähirli salamlaryny we iň gowy arzuwlaryny ýetirdi hem-de Aşgabadyň Günorta-Gündogar Aziýanyň iň uly ykdysadyýetleriniň biri bilen gatnaşyklara ýakynlaşmaga taýýardygyny tassyklady. Ösüşiň ileri tutulýan ugurlary – söwda we ykdysadyýet, ynsanperwer ugur we syýasy dialogdyr.
Ynanç hatyny gowşuryş dabarasyndan soňra Muhammetnyýaz Maşalow Tailand Patyşalygynyň DIM-niň ýolbaşçysy Sihasak Phuangketkeo bilen duşuşdy. Söhbetdeşlikde ministr Ilçiniň diplomatik işini amal aşyrmakda ýardam we goldaw bermäge taýýardygyny belledi.
