Gurluşykçylaryň ýerine robotlar: Dubaýda dünýäde ilkinji doly awtomatlaşdyrylan willa gurular
Dubaýyň häkimiýet edaralary täsin taslamanyň — dünýäde ilkinji diňe awtonom robotlar tarapyndan guruljak ýaşaýyş willasynyň gurluşygynyň başlanýandygyny yglan etdiler. Binanyň düýbünden başlap üçegine çenli ähli işleri adam gatnaşmazdan robotlar ýerine ýetirer. Bu taslama diňe bir tehnologik synagy bolman, gurluşyk pudagynda hünärmen ýetmezçiligi meselesini çözmek üçin hakyky nusga hökmünde göz öňünde tutulýar.
Başlangyç ConTech Valley merkeziniň Expo City Dubai şäherçesindäki açylyşynda tanyşdyryldy. Bu merkez “akylly” infrastruktura çözgütlerini synagdan geçirmek üçin esasy meýdança bolar. Taslamany amala aşyrmaga 25 sany ýokary tehnologiýaly kompaniýalardan we ylmy institutlardan ybarat halkara konsorsium gatnaşýar. Olara Wurth Group ýaly iri senagat toparlary we wençur gaznalary goldaw berýär.
Dubaý “70-70” strategiýasynda berkidilen uly maksatlary öňünde goýýar. 2030-njy ýyla çenli aşakdakylar meýilleşdirilýär:
• Gurluşyk işleriniň 70%-ini zawod şertlerinde taýýarlanylýan taýýar modullaryň önümçiligine geçirmek.
• Şol kärhanalarda awtomatlaşdyrma derejesini 70%-e ýetirmek.
Çaklamalara görä, 2033-nji ýyla çenli gurluşyk tehnologiýalaryna goýulýan dünýä maýa goýumlary 30 milliard dollardan geçer. Ösüşiň esasy hereketlendirijileri robotlaşdyrylan gurnama we 3D çap tehnologiýalary bolar. Bu usullar has çalt, has arzan we has howpsuz gurluşygy üpjün edýär.
Gurluşyk pudagy üçin bu tejribe “konstruktor” modeline geçmegi aňladýar: beýik jaýlar we ýaşaýyş toplumlary robotlar tarapyndan zawod şertlerinde taýýarlanan bloklardan ýygnalar. Bu ýalňyşlyk töwekgelçiligini azaldar, desgalaryň tabşyrylyş möhletini gysgaldar we işçi güýji ýetmezçiligini çözmäge kömek eder. Dubaý ýene-de bir gezek dünýä üçin täze ölçegleri kesgitleýän ählumumy tejribe barlag meýdançasydygyny tassyklaýar.
ORIENT
