Hytaýda dünýäniň iň uzyn deňiz üstündäki ýokary tizlikli demirýol köprüsiniň gurluşygynda möhüm tapgyr gazanyldy
Hytaýyň gündogar böleginde dünýäniň iň uzyn deňiz üstündäki ýokary tizlikli demirýol köprüsiniň gurluşygynda möhüm tapgyr tamamlandy. Anna güni uzynlygy takmynan 30 kilometre barabar bolan Hanžçou aýlagynyň üstünden geçýän köprüde ilkinji esasy diregiň gurnalyşy üstünlikli tamamlandy.
Bu taslama Hytaýyň ýokary tizlikli demirýol ulgamyny giňeltmek boýunça alyp barýan giň gerimli tagallalarynyň çäklerinde amala aşyrylýar. Köpri dünýäde iň güýçli deňiz tolkunlary bilen tanalýan, Sýantan derýasynyň meşhur tolkuny bilen belli bolan Hanžçou aýlagynyň üstünden geçýär.
Esasy direk deňiz derejesinden 200 metr beýiklikde ýerleşdirilen, bu bolsa takmynan 80 gatly binanyň beýikligine deňdir. Açyk deňiz şertlerinde gurluşyk işleri aýratyn çylşyrymly inženerçilik wezipelerini ýüze çykarýar.
Hanžçou aýlagynyň üstünden geçýän köpriniň taslamasynyň ýolbaşçysy, Hytaýyň iri köpri gurluşyk toparynyň wekili Szýan Benszýun bu sebitde deňiz derejesiniň bir günüň dowamynda dokuz metre golaý üýtgäp bilýändigini belledi. Şol bir wagtyň özünde köpri sagatda 350 kilometre çenli tizlige niýetlenen ýokary tizlikli demirýol standartlaryna laýyklykda taslanyp, her bir diregiň hyzmat möhleti bolsa 100 ýyl hökmünde hasaplanypdyr. Bu ýagdaýlar gurluşyk işlerini has-da kynlaşdyrýar.
Gurluşyk işlerini ýerine ýetirmek üçin gurluşyk toparlary açyk deňizde durnukly iş platformasyny döredip, aýlagyň ortasynda özboluşly «ýerüsti bazany» emele getirdiler. Şol bir wagtyň özünde akylly inženerçilik tehnologiýalary möhüm orny eýeleýär.
Szýan Benszýunyň aýtmagyna görä, ulanylýan ulgam gurluşygyň ähli görkezijilerini hakyky wagt tertibinde yzarlamaga mümkinçilik berýär. Bu bolsa ýolbaşçylara hem-de gurluşyk meýdançasyndaky işgärlere howpsuzlygy üpjün etmek maksady bilen çäreleri tiz wagtda sazlamaga şert döredýär. Ol ulanylýan ähli ulgamlaryň Hytaýda işlenip taýýarlanandygyny aýratyn nygtady.
Gurluşyk tamamlanandan soň, köpri deňiz üstündäki demirýol köprüleriniň gurluşygy babatda birbada bäş sany dünýä rekordyny goýar.
Hanžçou aýlagynyň üstünden geçýän demirýol köprüsiniň taslamasyny dolandyrmak bölüminiň ýolbaşçysy, Şanhaýyň «Guotiýe» inžener-gurluşyk kompaniýasynyň wekili Sýan Lipin häzirki wagta çenli taslama goýlan umumy maýa goýumynyň 11,2 milliard ýuana, ýagny takmynan 1,61 milliard ABŞ dollaryna ýetendigini habar berdi. Onuň sözlerine görä, gurluşyk işleriniň 75 göterimi eýýäm ýerine ýetirilip, köpriniň doly birikdirilmegi şu ýylyň sentýabr aýynda garaşylýar. Taslamanyň doly ulanyşa berilmegi bolsa 2027-nji ýylyň ahyryna meýilleşdirilýär.
Gurluşyk tamamlanandan soň ýokary tizlikli otlular Hanžçou aýlagyny takmynan 10 minudyň dowamynda geçip bilerler. Täze köpriniň ulag aragatnaşygyny ep-esli gowulandyrmagyna we Hytaýyň iň çalt ösýän ykdysady sebitleriniň biri bolan Ýanszy derýasynyň deltasynda ýokary hilli toplumlaýyn ösüşe itergi bermegine garaşylýar.
