Belarusda 2026-njy ýyl üçin harytlara täze talaplar tassyklandy
Belarusda 2026-njy ýyl üçin döwlet standartlaşdyryşynyň giň gerimli meýilnamasy tassyklandy. Resminama önümçilik düzgünlerini we hyzmatlaryň üpjün edilmegini täzelemäge gönükdirilen 450-den gowrak temany öz içine alýar. Esasy maksat — ýerli önümleriň hilini ýokarlandyrmak, olaryň daşary ýurt bazarlarynda bäsdeşlige ukyplylygyny artdyrmak we sarp edijileriň bähbitlerini goramakdan ybaratdyr diýip, BELTA habar berýär.
Umumylykda, takmynan 200 standart işlenip düzüler ýa-da täzelener. Üýtgeşmeler maşyn gurluşygyndan we robototehnikadan başlap, çagalar üçin niýetlenen harytlaryň hem-de azyk önümleriniň önümçiligine çenli dürli ugurlary öz içine alar. Aýratyn üns parfýumeriýa we kosmetika serişdeleriniň howpsuzlygyna, şeýle hem trikotaž önümleriniň we berhiz iýmitleriň hiline berler.
Täze düzgünler diňe senagat pudagyna däl, eýsem durmuş ugruna hem degişli bolar. Meýilnama syýahatçylygyň, logistika ulgamynyň ösdürilmegi we maýyplygy bolan adamlar üçin «elýeterli gurşawy» döretmek boýunça standartlary öz içine alýar. Mundan başga-da, bilermenler oýnawaçlar, attraksionlar hem-de çagalar oýun meýdançalary üçin enjamlaryň tehniki derejesini barlarlar.
Bu meýilnamanyň durmuşa geçirilmegi belarus kärhanalaryna innowasiýalary has çalt ornaşdyrmaga we importyň ornuny tutýan önümleri has netijeli öndürmäge mümkinçilik berer. Adaty alyjy üçin bolsa bu dükan tekjelerindäki harytlaryň has howpsuz we ýokary hilli boljakdygyny aňladýar, sebäbi olara bildirilýän talaplar dünýäniň iň häzirki zaman standartlaryna laýyk bolar.
ORIENT
