Azýa infrastruktura maýa goýum banky öz işiniň başlanmagynyň on ýyllygyny belleýär
Azýa infrastruktura maýa goýum banky (AIIB) anna güni öz işiniň başlanmagynyň on ýyllygyny belleýär. Bank şu güne çenli Aziýada we onuň daşyndaky 40 agza ýurt üçin umumylykda takmynan 70 milliard ABŞ dollaryna barabar bolan maliýeleşdirişi we goldawy tassyklady.
2016-njy ýylyň 16-njy ýanwarynda işe başlany bäri, bank 57 esaslandyryjy agza ýurtdan häzirki wagtda 111 agza ýurda çenli ösüp, möhüm global köpugurly maliýe instituty hökmünde ykrar edildi. Öz ilkinji on ýylynyň dowamynda AIIB energetika, ulag, sanly ykdysadyýet, şäherleri täzeden ösdürmek we beýleki möhüm ugurlar boýunça 361 taslamany tassyklady.
AIIB-niň täze bellenen prezidenti we direktorlar geňeşiniň başlygy Szou Szýai bankyň köpugurlylyk ýörelgelerine ygrarly galjakdygyny, sebit hyzmatdaşlygyny çuňlaşdyrjakdygyny we ýokary hilli, durnukly infrastruktura goldaw bermegini dowam etdirjekdigini belledi. Onuň aýtmagyna görä, bank ykdysady ösüşe ýardam etmegi, sanlylaşdyrmany öňe sürmegi, daşky gurşawy goramagy we agza ýurtlaryň ösüş mümkinçiliklerini giňeltmegi maksat edinýär.
Geljekde Azýa infrastruktura maýa goýum bankynyň ýolbaşçysy bankyň agzalar we hyzmatdaşlar bilen has ýakyndan hyzmatdaşlyk etmäge, amaly çäreleriň üsti bilen has köp taslamany öňe sürmäge, ösüşiň netijeliligini ýokarlandyrmaga, sebit durnuklylygyny berkitmäge hem-de Aziýada we onuň daşyndaky sebitlerde durnukly ösüşe ýardam etmäge taýýardygyny mälim etdi.
ORIENT
