Iýmitlenişiňizi gözegçilikde saklamaga kömek edýän kamera – Amazfit V1TAL
CES 2026 sergisinde Amazfit kompaniýasy emeli aň bilen enjamlaşdyrylan innowasion V1TAL kamerasyny tanyşdyrdy. Bu enjam ulanyjylara iýmitlenişini gözegçilikde saklamaga kömek edýär, sebäbi ol näme we nähili iýilýändigini seljerýär.
Işleýiş ýörelgesi örän ýönekeý: düwmä basmak arkaly kamera işjeňleşdirilýär we nahar wagtynda her birnäçe sekuntda surat alýar. Nahar tamamlanandan soň enjam öçürilýär, maglumatlar bolsa awtomatiki ýagdaýda Amazfit goşundysyna ýüklenýär.
Smartfonda iýmitiň suratyny düşürmekden tapawutlylykda, V1TAL nahar iýmegiň bütin prosesini dinamiki ýagdaýda ýazga alýar. Bu bolsa diňe bir nähili iýmitleriň iýilendigini däl, eýsem iýmegiň tizligini we naharyň doly iýlip-iýilmändigini hem bahalandyrmaga mümkinçilik berýär.
Emeli aň alnan maglumatlary seljerýär we şahsy maslahatlary berýär. Mysal üçin, nahar örän çalt gutaran bolsa, has haýal iýmegi maslahat berip biler ýa-da peýdaly gök önümleriň doly iýilmändigine ünsi çekip biler. Şeýle çözgüt horlanmak, myşsa massasyny artdyrmak ýa-da deňagramly iýmitlenişi saklamak isleýänler üçin aýratyn peýdalydyr.
Häzirki wagtda V1TAL diňe tanyşdyryş nusgasy bolup galýar — köpçülikleýin önümçilik häzirlikçe meýilleşdirilmeýär.
Artykmaçlyk: Amazfit Helios akylly äýnekleri — fitnes göz öňüňizde
Amazfit kompaniýasy fitnes höwesjeňleri üçin niýetlenen Helios akylly äýnekleriniň irki prototipini hem görkezdi. Enjamyň dizaýny heniz ahyrky görnüşinden daşda bolsa-da, bu äýnekleriň türgenler üçin amatly gural boljakdygy eýýäm äşgärdir.
Amazfit akylly sagatlary bilen bilelikde işläp, äýnekler ulanyjynyň görüş meýdanynda esasy maglumatlary görkezýär: ädimleriň sany, geçilen aralyk we ylgaýyş ýa-da welosiped sürüş wagtyndaky tizligi. Eger ulanyjy sagatda kesgitlenen ugur boýunça hereket edýän bolsa, äýnekler ädimme-ädim görkezmeleri hödürläp, smartfona ýa-da sagada seretmegiň zerurlygyny aradan aýyrýar.
Häzirlikçe Amazfit Helios-y köpçülikleýin önümçilige çykarmak boýunça anyk meýilnamalary yglan etmedi. Emma 2025-nji ýylyň ahyrynda kompaniýa hemişe açyk ekrany bilen 25 güne çenli işleýän Active Max sport akylly sagatlaryny çykardy.
Bu sagatlaryň bahasy 170 ABŞ dollarydyr. Helios äýnekleri, ähtimal, ylgaýanlar, welosipedçiler we artykmaç hereket etmän işjeňlik görkezijilerini yzarlamak isleýänler üçin gyzykly bolar.
ORIENT
